Արցախի արտաքին գործերի նախարարությունն այսօր նոր հայտարարություն է ընդունել խաղաղ բնակչության եւ օբյեկտների դեմ Ադրբեջանի հանցագործությունների վերաբերյալ: Այս փաստաթուղթը, ինչպես նախորդ օրը ընդունված փաստաթուղթը, շրջանառվել է ԵԱՀԿ-ում: Աշխատանքներ են տարվում դրանք ՄԱԿ-ում եւ այլ միջազգային կազմակերպություններում տարածելու ուղղությամբ: Այս մասին սեպտեմբերի 28-ի ուշ երեկոյան կայացած ճեպազրույցում հայտարարել է Արցախի արտգործնախարար Մասիս Մայիլյանը:
Ըստ նրա` փաստաթղթում նշվում են Ադրբեջանի կողմից կատարված կոպիտ խախտումներն ու հանցագործությունները, դրա կողմից Ժնեւի կոնվենցիաների խախտումը: «Արցախը եւս միացել է կոնվենցիաներին` դեռ 1993 թվականին, Արցախը կատարում է իր պարտավորությունները: Իսկ Ադրբեջանը խախտում է` չնայած այն հանգամանքին, որ ՄԱԿ-ի անդամ է եւ «ճանաչված» պետություն:
ԱԳՆ ղեկավարը հայտարարել է, որ գրեթե բոլոր մայրցամաքներից Ադրբեջանի գործողությունները դատապարտող ձայներ են լսվում` Հարավային եւ Հյուսիսային Ամերիկա, Եվրոպա, Ավստրալիա: Աշխատանքներ են տարվում լրատվամիջոցների հետ, պարզաբանվում է Արցախի դիրքորոշումը, տեղեկություններ են հաղորդվում սեպտեմբերի 27-ի առավոտյան եւ դրանից հետո տեղի ունեցածի մասին: Առաքելությունները ներգրավված են սփյուռքի կառույցների գործողությունների համակարգման գործում:
Առավել կարեւոր իրադարձությունների շարքում նախարարը մատնանշել է ԱՄՆ Պետդեպարտամենտի հայտարարությունը: «Այն տարբերվում է նրանով, որ ոչ միայն ռազմական գործողությունները դադարեցնելու եւ բանակցություններ սկսելու կոչ է պարունակում, այլ նաեւ հստակորեն մատնանշում է երրորդ երկրների մասնակցության անընդունելիությունը: Մենք դա Թուրքիային ուղղված կոչ ենք համարում, այն պետք է զսպող դեր խաղա: Եղել է Թրամփի պատասխանը լրագրողին, եւ նա եւս ասել է իրավիճակը կարգավորելու ջանքերի մասին: Նմանատիպ հայտարարություն է արել նաեւ Բայդենը: Ամերիկացի բոլոր հայտնի գործիչները խաղաղության կողմնակից են»,- ասել է Մայիլյանը:
