ՀՀ վարչապետ Նիկոլ Փաշինյանը եւ ՌԴ նախագահ Վլադիմիր Պուտինը նախորդ օրը կայացած հեռախոսազրույցի ընթացքում չեն քննարկել Ռուսաստանի Դաշնության հնարավոր ռազմական միջամտությունը ղարաբաղյան հակամարտությանը: Այս մասին Փաշինյանը հայտարարել է ռուս լրագրողներին տված հարցազրույցում:
«Մենք Ռուսաստանի Դաշնության նախագահի հետ չենք քննարկել Ռուսաստանի հնարավոր ռազմական միջամտությունը ղարաբաղյան հակամարտությանը: Մենք նաեւ դեռ կարիք չունենք օգտագործել 102-րդ ռուսական բազայի ներուժը, սակայն նման անհրաժեշտության դեպքում կան բոլոր իրավական հիմքերը»,- նշել է նա, փոխանցում է ՏԱՍՍ-ը:
Հայաստանը ցանկանում է որակապես նոր հարաբերություններ կառուցել Ռուսաստանի հետ, նշել է նա: «Հայաստանի եւ Ռուսաստանի Դաշնության հարաբերություններում ոչինչ տեղի չի ունեցել, եւ չկան նրբերանգներ, որոնք նախկինում չեն եղել: Ռուսաստանի հետ հարաբերություններում մեր նպատակը նոր մակարդակի եւ որակի հարաբերությունների կառուցումն է»,- ասել է Փաշինյանը:
Նրա խոսքով` Երեւանը միշտ պատրաստ է եղել ղարաբաղյան հիմնախնդրի խաղաղ կարգավորմանը, բայց հարցը չի լուծի ազգային անվտանգության հաշվին: «Հայաստանը միշտ պատրաստ է եղել ղարաբաղյան հիմնախնդրի խաղաղ կարգավորմանը, բայց դա չի նշանակում, որ (այն) պատրաստ է հարցը լուծել ի վնաս ազգային անվտանգության եւ ի վնաս Ղարաբաղի անվտանգության»,- ասել է Փաշինյանը, փոխանցում է «ՌԻԱ Նովոստի»-ն:
