Մենք շարունակում ենք մեզ նետված այս մարտահրավերին դիմագրավել, շարունակելու ենք պայքարել, բայց միաժամանակ ուզում եմ շեշտել, որ Արցախը այսօր էլ խաղաղության կողմնակից է եւ գտնում ենք, որ Արցախի հարցը պետք է լուծվի միանշանակ խաղաղ բնականցությունների միջոցով: Այս մասին այսօր՝ սեպտեմբերի 30-ին, ճեպազրույցի ժամանակ նշեց Արցախի նախագահի մամուլի խոսնակ Վահրամ Պողոսյանը:
«Այստեղ ապրում են մարդիկ, որոնք պայքարում են իրենց իրավունքների համար, ոչ մի ագրեսիա չի կարող մեզ ստիպել հետ կանգնել մեր նպատակներից»,-ասաց նա:
Վահրամ Պողոսյանը համեմատություն անցկացրեց 30 տարի առաջվա եւ այսօրվա իրադարձությունների միջեւ՝ նշելով. «Միջազգային լրատվամիջոցների մեր գործընկերները հաճախ են լսել, որ Ադրբեջանը հայտարարել է, որ իրենք տարածքներ են կորցրել: Իրականում 30 տարի առաջ Արցախի հայությունը կանգնել է իր իրավունքների համար եւ Ադրբեջանի կողմից ստացել է պարտադրված պատերազմ: Այդ պատերազմական գործողությունների արդյունքում ունեցել ենք այն, ինչ ունենք այսօր: Եթե այս ընթացքում Ադրբեջանը շարունակի իր ագրեսիվ գործողությունները, մենք չենք բացառում, որ ՊԲ-ն միայն իր նախկին բնագծերը վերականգնելով չի բավարարվի: Արցախի իշխանություններն արդեն հայտարարել են, որ այն նախահարձակ գործողությունները, որ սկսել է Ադրբեջանը դրա ամբողջ պատասխանատվությունը կրելու է Ադրբեջանի ռազմաքաղաքական ղեկավարությունը»,-ասաց նա: