Բոլոր փաստերը վկայում են խաղաղ բնակչության ուղղությամբ նպատակաուղղված կրակոցների մասին, որոնց ականատես է եղել երեկ նաեւ փաստերի հավաքագրման մեր խումբը, որը ադրբեջանական ԱԹՍ-ների պատճառով չի կարողացել ավարտել աշխատանքը: Մենք փաստորեն դարձել էինք թիրախ՝ հաշվի առնելով, որ մեր հարեւանությամբ չկային ռազմական օբյեկտներ կամ ռազմական տեխնիկա: Այդ մասին հոկտեմբերի 1-ին լրագրողների հետ հանդիպման ժամանակ հայտարարել է Հայաստանի Մարդու իրավուքների պաշտպան Արման Թաթոյանը: «Ինչ վերաբերում է փաստերի հավաքագրմանը Գեղարքունիքի մարզի բնակավայրերում, ապա գրանցվել է, որ Ադրբեջանի ԶՈՒ հրաձգության են ենթարկվել բնակելի շենքեր եւ Սոթքի դպրոցը:
Հայտնաբերվել են պայթած արկեր բնակելի շենքերից 20-60 մետր հեռավորության վրա, ինչը վկայում է քաղաքացիական բնակչության եւ ենթակառուցվածքի ուղղությամբ հարվածների նպատակաուղղված բնույթի մասին: Հարվածները քաղաքացիական բնակչության եւ ենթակառուցվածքի ուղղությամբ սկսվել են սեպտեմբերի 27-ին, սեպտեմբերի 28-29-ին դրանք դարձել են ավելի ագրեսիվ, սեպտեմբերի 29-30-ին քաղաքացիական բնակչության եւ ենթակառուցվածքի ուղղությամբ կրակոցներ են հնչել նաեւ գիշերը: Կարեւոր է նաեւ նշել, որ այդ ամենը տեղի է ունեցել համավարակի պայմաններում: Հավաքագրված փաստերը վաղն առավոտյան կփոխանցվեն ՄԻԵԴ-ում Հայաստանի ներկայացուցչին»,-տնդգծել է օմբուդսմենը:
