Ադրբեջանն ու Թուրքիան փորձում են ապատեղեկացնել համաշխարհային հանրությանը եւ համոզել, որ Թուրքիան չի մասնակցում Արցախի դեմ ագրեսիային, որ Ադրբեջանը վարձկանների չի օգտագործում, որ Արցախի քաղաքացիական օբյեկտները եւ եկեղեցիները չեն գնդակոծվում: Այս մասին հոկտեմբերի 15-ին մամուլի ասուլիսին ասաց ՀՀ վարչապետի գլխավոր խորհրդական Վաղարշակ Հարությունյանը:
Հարությունյանը հիշեցրեց, որ այս երկրների նախագահները միաձայն հայտարարել են, որ հակամարտության գոտում վարձկաններ չկան: «Ստացվում է հետեւյալը. ԵԱՀԿ Մինսկի խմբի համանախագահող բոլոր երկրները` Ռուսաստանը` ի դեմս արտաքին հետախուզության ղեկավարի, Պուտինը Էրդողանի հետ զրույցում, Ֆրանսիայի նախագահը մտահոգություն են հայտնել վարձկան ահաբեկիչների ներգրավման կապակցությամբ, անգամ ԱՄՆ պետքարտուղարն է մեղադրել Թուրքիային վարձկանների ներգրավման մեջ, էլ չասած այլ երկրներ մասին... Վարձկանների մասնակցության վերաբերյալ կան բազմաթիվ տեսանյութեր եւ աուդիոձայնագրություններ, որոնք նրանք փորձում են հերքել»,- ասաց Հարությունյանը:
Ըստ նրա` Ադրբեջանի համագործակցությունն ահաբեկիչների հետ նոր չի սկսվել, նրանք ղարաբաղյան առաջին պատերազմում նույնպես ակտիվորեն օգտվում էին վարձկանների ծառայություններից: Այս կապակցությամբ Վաղարշակ Հարությունյանը ԳՇ ներկայիս ղեկավար Նուրեդին Սադիխովի կողմից ստորագրված մի փաստաթուղթ ցույց տվեց, որի համաձայն 520 մարդ է ներգրավվում զորամաս եւ մասնակցում ռազմական գործողություններին: Հրաման կա պարսկերենին տիրապետող 15 պահեստազորի սպայի զորակոչի մասին: Կոնկրետ ազգանուններ կան: «Սա վկայում է այն մասին, որ Ադրբեջանն ահաբեկիչներ է ներգրավել 90-ականներին, այժմ էլ շարունակում է, դա սպառնում է ողջ տարածաշրջանին: Իրանը եւ Ռուսաստանի Դաշնությունը հայտարարեցին այդ մասին»,- շեշտեց Հարությունյանը: