Համաշխարհային ասպարեզում Միացյալ Նահանգների առանցքային հակառակորդը Չինաստանն է: Այսպիսի կարծիք է CBS հեռուստաընկերությանը տված հարցազրույցում հայտնել ԱՄՆ նախագահ Դոնալդ Թրամփը, հայտնում է ՏԱՍՍ-ը:
«Ո՞վ է մեր ամենամեծ արտաքին թշնամին»,- ամերիկացի առաջնորդին հարցրել է հեռուստաընկերության թղթակից Լեսլի Սթոլը: «Ես կասեի՝ Չինաստանը: Նա հակառակորդ է, մրցակից եւ շատ առումներով՝ թշնամի»,- պատասխանել է Թրամփը:
Հարցազրույցը ձայնագրվել է երեքշաբթի օրը՝ Սպիտակ տանը: CBS-ը նախատեսում է այն ամբողջությամբ հեռարձակել կիրակի օրը: Սակայն Թրամփը հինգշաբթի օրը իր Facebook-ում տեղադրել է զրույցի չմշակված տեսագրությունը՝ որպես Սթոլի պահվածքի դեմ բողոքի նշան: ԱՄՆ վարչակազմի ղեկավարի տեսանկյունից` հարցազրույց վերցնողը, ով ամերիկյան լրագրության վետերան է, գործել է անընդունելի, քանի որ անընդհատ ընդհատել է իրեն, կանխակալ է տրամադրված եղել եւ ոչ օբյեկտիվ գնահատականներ է տվել իր որոշ ասածներին: Թրամփն այս զրույցի նկարահանումը ժամանակից շուտ է ավարտել: