ԵԽԽՎ Հայաստանի հարցով համազեկուցողներ Ջոն Պրեսկոտն ու Ալեքս Ֆիշերը ողջունել են Հայաստանում համաներում հայտարարելու ԱԺ որոշումը:
Ինչպես NEWS.am-ը տեղեկանում է ԵԽԽՎ մամուլի ծառայությունից, համազեկուցողները նշել են, որ համաներումը կհանգեցնի 2008-ի մարտյան դեպքերի հետ կապված անազատության մեջ հայտնված բոլոր անձանց ազատ արձակմանը:
«Այդ մարդկանց ազատ արձակումը եւ 2008-ի մարտյան դեպքերի ժամանակ 10 զոհերի մահվան հանգամանքների հետաքննության վերսկսումը կվերացնի վերջին խոչընդոտները քաղաքական մթնոլորտը նորմալացնելու ճանապարհին եւ կբացի կառուցողական երկխոսության դուռը իշխանությունների եւ ընդդիմության միջեւ: Դա շատ դրական զարգացում է Հայաստանի համար»,- ասված է Հայաստանի հարցով համազեկուցողների հայտարարության մեջ:
Նրանք նաեւ նշել են, որ ոգեւորված են Լեւոն Տեր-Պետրոսյանի վերջին հայտարարություններից, որտեղ նա հստակ նշել է, որ պատրաստ է երկխոսության:
«Այդ դրական զարգացումները, իշխանությունների եւ ընդդիմության կառուցողական վերաբերմունքը ժողովրդավարության զարգացման եւ երկրում մարդու իրավունքների պաշտպանության իրավիճակը բարելավելու գործում, հույս ունենք, որ կհաստատվեն իսկական ժողովրդավարական ընտրությունների անցկացմամբ 2012-ին: Մենք հետայսու եւս ջանքեր կներդնենք եւ կշարունակենք համագործակցությունը բոլոր քաղաքական ուժերի հետ, որպեսզի դա կյանքի կոչվի:
Ջոն Պրեսկոտն ու Ալեքս Ֆիշերը մտադիր են Հայաստան այցելել այս ամռանը, նախապատրաստելու համար զեկույց` Հայաստանում ժողովրդավարական ինստիտուտների գործունեության վերաբերյալ: Զեկույցը ԵԽԽՎ-ին կներկայացվի հոկտեմբերին: