Ֆրանսիայի դատախազությունը Լիոնում հունական տաճարի ուղղափառ հոգեւորականի վրա հարձակման կապակցությամբ կուսումնասիրի հնարավոր անձնական կոնֆլիկտի վարկածը հանցագործի եւ տուժածի միջեւ: Այդ մասին կիրակի հաղորդել է BFM հեռուստաալիքը:
Նրա տեղեկություններով՝ քննիչները դիտարկում են այդ վարկածը այն կապակցությամբ, որ հոգեւորականը հարձակման պահին չի եղել եկեղեցու ծառայողին բնորոշ հանդերձանքով: Բացի այդ, այդ ժամանակ տաճարում որեւէ կրոնական արարողություն չի անցկացվել:
Այդուհանդերձ, ինչպես հայտնել է Լիոնի դատախազ Նիկոլյա Ժակեն, ներկայում որեւէ վարկած չի բացառվում: Նրա խոսքով՝ հետաքննիչները գտնվում են հանրապետության դատախազության հակաահաբեկչական ստորաբաժանման հետ շփման մեջ, հաղորդում է ՏԱՍՍ-ը:
Լիոնում հունական եկեղեցու 52-ամյա հոգեւորականի վրա հարձակումը կատարվել է շաբաթ երեկոյան, երբ նա փակում էր տաճարի դռները: Հանցագործը երկու անգամ կրակել է իր զոհի ուղղությամբ: Տուժածը հոսպիտալացվել է ծանր վիճակով, բժիշկները պայքարում են նրա կյանքի համար: Մի քանի ժամ անց քաղաքապետարանում աղբյուրները հայտնել են, որ իրավապահները բերման են ենթարկել մահափորձի կասկածյալին:
