Հայաստանի Հանրապետության եւ Եվրամիության միջեւ Համապարփակ եւ ընդլայնված գործընկերության մասին համաձայնագրի վավերացման գործընթացի ավարտի մասին ԵՄ քարտուղարությանը չեն հայտնել միայն Իտալիան, Իսպանիան եւ Պորտուգալիան: Այս մասին Հայաստանի Ազգային ժողովում ֆինանսավարկային եւ բյուջետային հարցերի, ինչպես նաեւ եվրոպական ինտեգրման հարցերի մշտական խորհրդարանական հանձնաժողովների համատեղ նիստին 2021 թվականի բյուջեի նախագծի քննարկման ժամանակ ասաց ՀՀ փոխարտգործնախարար Ավետ Ադոնցը:
Ընդ որում, նա նշեց, որ այդ երեք երկիրը, այնուամենայնիվ, ավարտել են վավերացման ներքին ընթացակարգերը. «ԵՄ բոլոր 27 երկրներում վավերացման գործընթացն ավարտված է, սակայն կա եւս երեք երկիր` Իտալիան, Իսպանիան եւ Պորտուգալիան, որոնք դեռ պաշտոնապես չեն տեղեկացրել ԵՄ քարտուղարությանը վավերացման գործընթացի ավարտի մասին»,- շեշտեց Ադոնցը: Փոխնախարարը նաեւ նշեց, որ համաձայնագրի վավերացման գործընթացը կավարտվի միայն այն ժամանակ, երբ այդ երկրները քարտուղարությանը կհայտնեն դրա վավերացման մասին:
Նշենք, որ «Հայաստանի Հանրապետության եւ Եվրամիության միջեւ համապարփակ եւ ընդլայնված գործընկերության մասին» համաձայնագիրը ստորագրվել է 2017-ի նոյեմբերի 24-ին Բրյուսելում:
