Հունաստանի, Իսրայելի եւ Կիպրոսի պաշտպանության նախարարները պայմանավորվել են ակտիվացնել ռազմական համագործակցությունը, ինչը, նրանց կարծիքով, կբարելավի իրենց զինված ուժերի պատրաստակամությունը, կօգնի ավելի շատ աշխատատեղեր ստեղծել եւ ամրապնդել անվտանգությունը տարածաշրջանում, հայտնում է AP-ը։
Իսրայելի պաշտպանության նախարար Բենի Հանցը հայտարարել է, որ Նիկոսիայի բանակցություններում համաձայնության են եկել «խթանել լայնածավալ արդյունաբերական համագործակցությունը, որը կուժեղացնի պաշտպանական կարողությունները եւ հազարավոր աշխատատեղեր կստեղծի բոլոր երեք տնտեսությունների համար»:
Երեք երկրները սերտ կապեր են հաստատել Միջերկրական ծովի արեւելքում գազի արդյունահանման իրավունքների շուրջ տարածաշրջանային լարվածության ֆոնին եւ գործընկերներ են՝ ստորգետնյա խողովակաշարով գազը դեպի մայրցամաքային Եվրոպա, դեպի ծովային Իսրայել եւ, հնարավոր է, այլ երկրներ տեղափոխելու նախագծի համար:
Հունաստանի պաշտպանության նախարար Նիկոլաոս Պանագիոտոպուլոսը հայտարարել է, որ Հունաստանի, Իսրայելի եւ Կիպրոսի զինված ուժերը աշխատում են ավելի լավ փոխգործակցության համար՝ համատեղ ուսուցման, հետախուզական տվյալների փոխանակման եւ կիբեռանվտանգության ծրագրերի միջոցով:
Նա եւ նրա կիպրացի գործընկեր Խարալամբոս Պետրիդեսը հայտարարել են, որ երեք երկրները ձգտում են ընդլայնել գործընկերությունը եւ ներառել այլ երկրներ, ինչպիսիք են Միացյալ Նահանգները, որոնց ներկայությունը արեւելյան Միջերկրական ծովում, ըստ հույն նախարարի, «առանձնահատուկ նշանակություն ունի» տարածաշրջանային կայունության համար:
