Մեծ Բրիտանիայի, Գերմանիայի, Իսպանիայի եւ ԵՄ անդամ այլ երկրների ղեկավարներին կոչ են արել անցնել քառօրյա աշխատանքային շաբաթի՝ օգնելու եվրոպական տնտեսությանը վերականգնվելու կորոնավիրուսի համավարակից: Քաղաքական գործիչների, արհմիությունների առաջնորդների, ձեռնարկությունների ղեկավարների միջազգային կոալիցիան դիմել է եվրոպական երկրների ղեկավարներին՝ կոչ անելով նրանց պահանջել այդ միջոցի ընդունումը, հաղորդում է RG-ը:
Մեծ Բրիտանիայի վարչապետ Բորիս Ջոնսոնին, Գերմանիայի կանցլեր Անգելա Մերկելին, Իսպանիայի վարչապետ Պեդրո Սանչեսին եւ մյուս առաջնորդներին ուղարկված նամակում նշվում է, որ քառօրյա շաբաթը կօգնի հաղթահարել համավարակի հետեւանքով առաջացած տնտեսական անկումը: Կոչում ասվում է, որ «քաղաքակրթության զարգացման համար եկել է այս հնարավորությունից օգտվելու եւ աշխատանքային ժամերի կրճատման անցնելու ժամանակը՝ առանց աշխատավարձերը կորցնելու»,- նշում է The Daily Mail-ը: Ավելի վաղ Նոր Զելանդիայի վարչապետ Ջասինդա Արդերնը հայտարարել էր քառօրյա աշխատանքային շաբաթին աջակցելու մասին, իսկ Շոտլանդիայի եւ Ուելսի կառավարությունները ստեղծել էին հանձնաժողովներ՝ այդ գաղափարը ուսումնասիրելու համար:
Նամակում նաեւ բերվում են համաշխարհային ճգնաժամերի ընթացքում աշխատաժամանակի կրճատման պատմական օրինակներ, ներառյալ` Մեծ դեպրեսիայից հետո լրացուցիչ հանգստյան օրերի եւ ավելի կարճ աշխատանքային ժամերի ներդրումը: Դիմումի հեղինակները պնդում են, որ ավելի կարճ աշխատանքային շաբաթը կարող է նաեւ նպաստել կլիմայի փոփոխության լուծմանը: Հուլիսին Survation կազմակերպության հարցումը ցույց էր տվել, որ բրիտանացիների գրեթե երկու երրորդը ցանկանում է, որ Ջոնսոնն ուսումնասիրի համավարակից հետո քառօրյա աշխատանքային շաբաթ ներմուծելու հնարավորությունը: Մինչդեռ որոշ տնտեսագետներ պնդում են, որ ավելի քիչ աշխատանքային ժամերը կիջեցնեն կենսամակարդակը, իսկ Բրիտանական արդյունաբերության կոնֆեդերացիան դեռ անցյալ տարի դեմ էր հանդես եկել քառօրյա աշխատանքային շաբաթի ներդրմանը:
