Շահառուներին օգնություն կտրամադրվի ինչպես միաժամանակյա նպաստների, այնպես էլ երկարաժամկետ փոխհատուցումների վճարման եղանակով: Մենք դա անվանում ենք ֆինանսական փոխհատուցումներ: Այս մասին լրագրողների հետ զրույցում ասաց Զինծառայողների ապահովագրության հիմնադրամի գործադիր տնօրեն Վարուժան Ավետիքյանը:
Այսպես, նրա խոսքով, փոխհատուցում կարող են ստանալ զոհված զինծառայողների ընտանիքները, ինչպես նաեւ 1-ին խմբի հաշմանդամություն ստացած կամ անհետ կորած զինծառայողների ընտանիքները: Նրանք կարող են միաժամանակյա փոխհատուցում ստանալ 10 մլն դրամի չափով, ապա ամեն ամիս առաջիկա 20 տարվա ընթացքում նրանց կվճարվի 200 հազարից մինչեւ 300 հազար դրամ: Սպաների ընտանիքները կստանան առավելագույնս 300 հազար դրամ:
«Ընդ որում, երկրորդ խմբի հաշմանդամություն ստացած զինծառայողները եւս կարող են միաժամանակյա փոխհատուցում ստանալ, սակայն արդեն 5 մլն դրամի չափով, ապա 20 տարվա ընթացքում կարող են ստանալ 100-200 հազար դրամ»,-նշեց Ավետիքյանը:
Նա հավելեց, որ զինծառայողները, որոնք ունեն 3 եւ ավելի երեխաներ, կստանան հավելյալ փոխհատուցում 100 հազար դրամի չափով:
