Երեւանում այսօր` հունիսի 1-ին ժամը 9:45-ի սահմաններում, Երեւան-Էջմիածին ավտոճանապարհին Զվարթոց թաղամասի մոտ տեղի է ունեցել վթար` մոտոցիկլետավարի կողմից:
Ինպես դեպքի վայրից NEWS.am-ին հայտնում է ֆոտոլրագրող Գագիկ Շամշյանը, Yamaha մակնիշի մոտոցիկլետի վարորդը, ըստ նախնական տեղեկությունների, նախ հարվածել է եզրաքարին, ապա մայթեզրին գտնվող չգործող կրպարկին: Հարվածն այնքան ուժեղ է եղել, որ նա մոտոցիկլետի վրայից վայր է ընկել, ըստ ականատեսների` գլխից ընկել է սաղավարտը:
Դեպի վայրում քննչական աշխատանքները ղեկավարել է Ոստիկանության քննչական գլխավոր վարչության Արմավիրի մարզի քննչական բաժնի Վաղարշապատի քննչական բաժանմունքի քննիչ Ազատ Գրիգորյանը, ում հանձնարականով մոտոցիկլետը տղափոխվել է Վաղարշապատի բաժնի տուգանային հրապարակ:
Պարզվել է, որ մոտոցիկլետավարը եղել է Երեւանի 24-ամյա բնակիչ Ավագ Աբրահամյանը, ում տեղափոխել են Էջմիածնի հիվանդանոցի վերակենդանացման բաժանմունք:
Ականատեսները դեպքի վայրում հայտնել են, որ մոտոցիկլետները 3-ն են եղել, որոնք մեծ արագությամբ սլացել են մայրուղով, ինչի արդյունքում էլ տեղի է ունեցել վթարը:
Վաղարշապատի քննչական բաժանմունքի քննիչ Ազատ Գրիգորյանի կողմից նյութեր են նախապատրաստվում:
Լուսանկարները եւ տեսանյութը` Գագիկ Շամշյանի