Շաբաթ օրը Փարիզի դատարանի ահաբեկչության հարցերով դատավորը Փարիզի հրեական թաղամասի Ռոզյե փողոցում 1982թ. պայթեցման եւ հրաձգության մեղադրանք է առաջադրել Վալիդ Աբդուլռահման Աբու Զայեդին: Այս մասին հայտնում է Agence France-Presse-ը՝ վկայակոչելով դատարանի աղբյուրները:
Մեղադրանքները ներկայացվել են սպանության եւ սպանության փորձի համար: Ուրբաթ երեկոյան Նորվեգիայից Աբու Զայեդը արտահանձնվել է Ֆրանսիա եւ բերման է ենթարկվել: Ֆրանսիացի քննիչները կասկածում են, որ նա ահաբեկչության հիմնական մասնակիցներից մեկն է եղել: Մեղադրյալը, սակայն, ամբողջությամբ հերքում է իր մասնակցությունը ահաբեկչությանը եւ պնդում է, որ այդ ժամանակ ինքը գտնվում էր Մոնակոյում: Այս գործի հետաքննությունը շատ բարդ էր եւ անցկացվում էր երկար տարիներ:
1982թ․ օգոստոսի 9-ի օրվա կեսին 3-5 հոգուց բաղկացած խումբը նախ նռնակ էր նետել Ջո Գոլդենբերգի ռեստորանի մեջ, ապա ավտոմատ զենքից կրակ էր բացել նախ այցելուների, ապա հրեական թաղամասի անցորդների ուղղությամբ: Ահաբեկչության հետեւանքով վեց մարդ զոհվել էր, 22-ը՝ վիրավորվել: Ահաբեկչությունը կազմակերպելու եւ իրականացնելու մեջ կասկածվում է պաղեստինյան «Ֆաթահ - հեղափոխական խորհուրդ» խմբավորումը, հաղորդում է ՏԱՍՍ-ը:
Ֆրանսիական արդարադատությունը նաեւ երեք այլ միջազգային օրդեր է տվել այս ահաբեկչության կազմակերպման կամ կատարման մեջ կասկածյալների ձերբակալման համար: Նրանցից երկուսը գտնվում են Հորդանանում, իսկ երրորդը՝ Արեւմտյան ափին: