News
Լրահոս
News
Ուրբաթ
Հունվար 21
USD
481.66
EUR
546.54
RUB
6.29
Տեսնել լրահոսը


Իմ խորին համոզմամբ՝ Վազգեն Մանուկյանը ոչ միայն ամենահարմար, այլև վարչապետի ամենաարդյունավետ թեկնածուն է, որովհետև մենք գտնվում ենք այնպիսի իրավիճակում, երբ պարտությունը շարունակվում է, երբ կորուստները շարունակվում են և մեզ անխուսափելիորեն սպասում են բազմաթիվ ճգնաժամեր, որոնք միաժամանակ են լինելու։ Այս մասին NEWS.am-ի հետ զրույցում ասաց Արտակարգ և լիազոր դեսպան, ԱԱԾ նախկին ղեկավար Դավիթ Շահնազարյանը։

«Կարևորագույն խնդիրն անվտանգության հարցերն են, որոնք բացարձակապես լուծված չեն, և արդեն խոցված, բզկտված անվտանգությունը շարունակում է գահավիժել։ Սոցիալ-տնտեսական ճգնաժամը, եթե չասեմ՝ կոլապսը, ակնհայտ է, այդ թվում՝ հոգեբանական և ամենակարևորներից մեկը՝ մեր արժանապատվության ճգնաժամը։ Շարժումը պետք է համազգային դառնա և իշխանությունները, նրանց սպասարկող ուժերը, մեծ քանակությամբ դրսի ուժեր, թշնամական ուժեր փորձում են Վազգեն Մանուկյան-Նիկոլ Փաշինյան անձերի պայքար ներկայացնել, ինչը բացարձակապես այդպես չէ, պետք է այդ մտածողությունից դուրս գանք։ Շարժման և իշխանությունների նպատակները տրամագծորեն հակառակն են, այս իշխանությունները առաջին օրվանից սպասարկել և մինչև այսօր շարունակում են սպասարկել դրսի ուժերի շահերը»,– ասաց Շահնազարյանը։

Նրա փոխանցմամբ՝ 2018 թվականից մինչեւ այսօր Հայաստանի իշխանության ներկայացուցիչները շփումներ են ունեցել Թուրքիայի պաշտոնյանների հետ։

«Փաշինյանի էմիսարներն այդ շփումներն ունեցել են սեպտեմբերի 27-ից օրեր առաջ և նույնիսկ պատերազմի ժամանակ։ Առայժմ մանրամասն բացահայտումներ չեմ անի, բայց մոտ ապագայում կխոսեմ նաև դրա մասին։ Ընդամենը մի փաստ ներկայացնեմ. անցյալ տարի Հայաստանի իշխանությունները հայտարարեցին, որ Շիրակը պետք է ազատ տնտեսական գոտի լինի, իսրայելական մի ընկերություն պետք է դա սպասարկեր, այնտեղ մեծ մաքսատուն կառուցվեց, այն պատրվակով, որ ավտոմեքենաների մեծ ներկրում կա, բավականին մեծ ծախսեր արվեցին, ինձ կարո՞ղ եք ասել՝ Շիրակը ի՞նչ ազատ տնտեսական գոտի կարող է լինել, որովհետև այնտեղ ընդհանրապես հաղորդակցություն չկա, Շիրակը տարանցիկ տեղ չէ։ Սա այն դեպքում, երբ նախորդ իշխանությունների օրոք Սյունիքն էր ազատ տնտեսական գոտի հայտարարվել, բավական էֆեկտիվ էլ գործում էր Իրանի հետ։ Այսինքն՝ այն ժամանակվանից գիտեին, որ Թուրքիայի հետ պետք է սահմաններ բացվեն, այլ բացատրություն գոյություն չունի, որովհետև աշխարհագրական իմաստով այնտեղ որևէ կոմունիկացիա Հայաստանից դուրս չկա, միակ ճանապարհը Ջավախք գնացողն է»,– ընդգծեց Դավիթ Շահնազարյանը։

Ըստ նրա՝ նոյեմբերի 9–ին Նիկոլ Փաշինյանի ստորագրած փաստաթղթում Հայաստանի և Ադրբեջանի սահմանների վերաբերյալ որևէ խոսք չկա։

«Կա ուրիշ բան, որ զինված ուժերը կանգնում են այնտեղ, որտեղ կան, իսկ այսօր հետ են քաշվում, Սոթքի օրինակը, այն, ինչ կատարվում է Սյունիքում այս իշխանությունների կողմից ոչ թե թողտվություն է, այլ այդ քաղաքականության շարունակությունն է Սյունիքում քաոս ստեղծելը»,– ասաց նա։

 Դավիթ Շահնազարյանի խոսքով՝ նոր ձևավորվելիք կառավարության խնդիրը պետք է լինի եռակողմ փաստաթղթի անորոշությունները շտկելը։

«Այո, մենք չենք կարող դրանից հրաժարվել, բայց այդ փաստաթղթում կան շատ անորոշություններ, որոնք մինչև այսօր իրականացվում են բացառապես ի վնաս մեզ, որովհետև այս իշխանությունը չի էլ փորձում բանակցել և փորձել այդ անորոշությունները ներկայացնել գոնե ինչ–որ մասով, որպեսզի մեր շահերին համապատասխանի, անում է հակառակը։ Շարունակում է սպասարկել մասնավորապես Թուրքիայի և Ադրբեջանի շահերը, ինչն արել է բանակցային ամբողջ գործընթացում։ Ամիսներ առաջ ես հայտարարել էի, որ Փաշինյանի իշխանությունը բանակցում է Լեռնային Ղարաբաղում համատեղ բնակության գոտիների ստեղծման շուրջ և առաջին հերթին, որպեսզի այդ գոտին լինի Շուշին։ Ասում են՝ Շուշին որտեղից է հայտնվել, այդտեղից է հայտնվել։ Ավելին՝ այդ պայմանավորվածությունները Ալիևի հետ եղել են, և ոչ միայն նրա հետ։ 2019 թվականի հունվարին Փարիզում եռանախագահողների և արտգործնախարարների հանդիպման ժամանակ որոշում էր ընդունվել այսպես կոչված՝ խաղաղության միջոցառումների մասին, այն դեպքում, երբ Ադրբեջանն ակնհայտորեն պատրաստվում էր պատերազմի, հիմա խոսում են ինչ–որ պաշտպանական կառույցների մասին, բայց չէ՞ որ Փաշինյանը հնարավորություն տվեց, որ Ադրբեջանն Արցախի Հանրապետության հետ իր շփման գծով ստեղծի այդ պաշտպանական կառույցները, ես 2018 թվականի նոյեմբեր–դեկտեմբերին ցույց եմ տվել նույնիսկ այդ կառույցները, երբ այսպես կոչված՝ զինադադարի ռեժիմի պահպանումը Ադրբեջանը բացառապես օգտագործեց դրա համար, մեծ քանակությամբ այդ բլուրները, որոնց նկարները ես այն ժամանակ ցույց եմ տվել, շատացան և դրանք հարձակողական բնույթի էին»։

Ըստ նրա՝ մեր պետականությունն ու անվտանգությունը սպառնալիքի տակ է, պետք է կանգնեցնել  բազմակողմանի գահավիժումը, որը հնարավորություն կունենա իրականացնել միայն հակաճգնաժամային Կառավարությունը։

«Չափազանց բարդ խնդիր է, և դա հնարավոր է անել միայն ազգային միասնականության շնորհիվ։ Իշխանության առաջին օրվանից Փաշինյանը թե՛ ներքին, թե՛ արտաքին քաղաքականությունում ունեցել է մի նպատակ, որին ինքը հասել է, բայց ոչ ամբողջությամբ, դա պետք է կանխել։ Ցավոք, մեր հասարակությունն այսօր շարունակում է մնալ մոլորված, հիասթափված, մի մասի մոտ հուսահատություն է, հավատը կորցրել են, կա նաև մի հատված, որը չի ուզում համակերպվել, որ երկուսուկես տարի առաջ շատ մեծ սխալ է գործել։ Ժողովուրդն իր սխալների համար պետք է վճարի, մեր ժողովուրդը հիմա այդ փուլում է, ինչքան շուտ մենք կարողանանք հեռացնել իշխանությանը, այնքան ավելի մեծ հնարավորություն կունենանք մեղմելու բոլոր հետևանքները»,– ասաց նա։

Դավիթ Շահնազարյանի խոսքով՝ Փաշինյանն իր քաղաքականությամբ պատերազմն անխուսափելի դարձրեց։

«Իր քաղաքականությամբ նա բազմաթիվ փաստարկներ տվեց Ադրբեջանին և Թուրքիային, որով նրանք, ըստ էության, արդարացրեցին այս ագրեսիան, արդարացրեցին իրենց ռազմական հարձակումը Հայաստանի վրա, որը հիմա էլ շարունակվում է։ Սրա միջազգային հետևանքները Եվրոպան դեռ լավ չի գիտակցում։ Եվրոպայի համար «Պանդորայի արկղ» է բացվել, որ հարցերը, խնդիրները և վեճերը կարելի է լուծել ռազմական ճանապարհով, և չափազանց մեծ է վտանգը, որ շատ մոտ ժամանակներս Թուրքիան կարող է  նման ռազմական գործողություններ կատարել նաև ԵՄ երկրների նկատմամբ, և մոտակա օրերին Եվրոպայում սպասվում է ահաբեկչության նոր ալիք, դրանք այն նույն ահաբեկչական կենտրոններն են, որոնք սպասարկում էին Թուրքիայի և Ադրբեջանի շահերը, դրանք այն նույն ահաբեկչական կենտրոնի գրոհայիններն են, որոնք այսօր գտնվում են Ադրբեջանում, Նախիջևանում, և սա լրջագույն վտանգ է։ Աշխարհաքաղաքական այս ծանրագույն զարգացումներում մենք պետք է օր առաջ ունենանք հակաճգնաժամային Կառավարություն, որի ծրագրերն ու գործունեությունը պետք է հիմնված լինեն բացառապես երկու սկզբունքի վրա՝ հայրենասիրություն և պրագմատիզմ»,– ընդգծեց նա։

Շահնազարյանի համոզմամբ՝ օր առաջ Հայաստանը պետք է վերսկսի բանակցությունները ԵԱՀԿ Մինսկի խմբի համանախագահության շրջանակում, բայց  դա որևէ կերպ չի կարելի անել այս իշխանությունների օրոք, որոնք ըստ նրա՝ այս երկուսուկես տարիների ընթացքում ջուր են լցրել Թուրքիայի և Ադրբեջանի ջրաղացին՝ անընդհատ թուլացնելով ԵԱՀԿ Մինսկի խմբի դերը։

Դավիթ Շահնազարյանի դիտարկմամբ՝ Նիկոլ Փաշինյանը պետք է հեռանա կամավոր, այլապես ցնցումները կարող են ճակատագրական լինել ոչ միայն Հայաստանի, այլև ամբողջ տարածաշրջանի համար։

««Հայրենքի փրկության շարժման» նպատակն է, որ իշխանափոխությունը անցնցում լինի, իսկ Փաշինյանը, ըստ էության, հայտարարում է՝ կամ ես կլինեմ Հայաստանի ղեկավարը, կամ Հայաստանը չի լինի։ Սա շահերի բախում է, այսինքն՝ մենք գործ ունենք  մի իշխանության հետ, որի նպատակն է՝ Հայաստանի և Արցախի համար ինչքան վատ, այնքան լավ և այնքան համապատասխանում է իրենց խնդրին, որն իրենց առաջ դրվել է երկուսուկես տարի առաջ։ Այո, անցնցում, որովհետև ցնցումները ճակատագրական կարող են լինել ոչ միայն Հայաստանի համար, այլ ամբողջ տարածաշրջանի համար։ Աշխարհաքաղաքական տարբեր ուժերի բախումները հիմա Հայաստանում շատ բարձր է, և Հայաստանը դարձել է այդ ուժերի բախումների փորձադաշտ, մենք պետք է դա հեռացնենք։ Սա առաջիկա իշխանությունների համար մեկ խնդիրը պետք է լինի և հանրությունը պետք է սթափվի»,– ասաց նա։ 

!
Այս նյութը հասանելի է նաև   Русский
Տպել
Ամենաշատ