Հայաստանում տնտեսական իրավիճակն իսկապես աղետալի է: Դա նկատելի է թե՛ բյուջեի կատարողականի, թե՛ ՀՆԱ-ի անկման, թե՛ ներդրումների ծավալների կրճատման, թե՛ տարածքային կորուստների տեսանկյունից: Այս մասին դեկտեմբերի 15-ին երիտասարդների հետ հանդիպմանն ասաց Հանուն հայրենիքի փրկության շարժման վարչապետի թեկնածու Վազգեն Մանուկյանը՝ պատասխանելով ներկաների հարցերին:
Այսպես, ըստ նրա, կորցրել ենք շուրջ 100 հազար հա վարելահող, 315 հազար հա կանաչ տարածք, 15 հիդրոէլեկտրակայան եւ 100 մեգավատտ էներգիա:
«Այսինքն՝ մեր կորուստները շատ մեծ են, իսկ ծախսերն ավելացել են»,- նշեց Մանուկյանը:
Միեւնույն ժամանակ, քաղաքական գործիչը նշեց, որ ոչ մի նորմալ գործարար Հայաստանում նշանակալի ներդրումներ չի կատարի, հավելելով, որ առանց իրական ներդրումների երկրին չի հաջողվի դուրս գալ ստեղծված չափազանց անբարենպաստ իրավիճակից:
«Հայաստանն անկայուն երկիր է՝ ռազմական գործողությունների վերսկսման մշտական սպառնալիքով, ինչը խնդիրների կհանգեցնի հաղորդուղիների ապահովման առումով: Հայաստանում ներդրումներ կարող է կատարել միայն այն գործարարը, որը էթնիկ հայ է, ներդրումներ է կատարում ոչ թե այդ պահին շահույթ ստանալու նպատակով, այլ միայն իր ազգային պատկանելությունից դրդված: Նման ներդրումների մեջ նրանց համար զգալի ռիսկ կա: Նման ներդրումները չեն կարող մեծ մասնաբաժին կազմել, հետեւաբար չեն կարող ինչ-որ կերպ փոխել իրավիճակը»,- պարզաբանեց վարչապետի թեկնածուն:
