Հայաստանը միջազգային ասպարեզում, ցանկացած պարագայում, պետք է ունենա իր ներկայացուցչին, եւ այդ ներկայացուցիչը պետք է լինի հանրապետության նախագահը: Այս մասին դեկտեմբերի 23-ին լրագրողների հետ հանդիպմանն ասաց «Լուսավոր Հայաստան» կուսակցության եւ դրա խորհրդարանական խմբակցության ղեկավար Էդմոն Մարուքյանը:
Քաղաքական գործչի խոսքով` ամեն ինչ տանուլ տված վարչապետը պետք է անպայման հրաժարական տա, սակայն նույնիսկ իր հրաժարականից առաջ նա չի կարող երկիրը ներկայացնել միջազգային ասպարեզում: Մարուքյանը հիշեցրեց, որ ԱՊՀ պետությունների ղեկավարների վերջին հանդիպմանը Հայաստանի վարչապետը, չնայած եւ հարգելի պատճառով, սակայն բացակայում էր, իսկ ահա Ադրբեջանի նախագահը, հակառակը, մասնակցում էր:
«Մենք առաջարկում ենք լիազորել նախագահին բանակցություններ վարել Հայաստանի ղեկավարության անունից»,- պարզաբանեց խորհրդարանականը: Քաղաքական գործչի խոսքով` երկրի նախագահը պետք է ներկայացնի Հայաստանը միջազգային բոլոր հարթակներում: Մարուքյանը համոզված է, որ նախագահի սահմանադրական դերը ընդհանուր առմամբ պետք է վերանայվի: Նա նաեւ նշեց, որ շատ հարցեր այժմ ոչ հօգուտ Հայաստանի են լուծվում արդյունավետ բանակցողի բացակայության պատճառով:
