Ֆրանսիացի հետաքննիչները կհարցաքննեն Nissan ավտոմոբիլային ընկերության նախկին գործադիր տնօրեն Կառլոս Գոնին Լիբանանում, որտեղ նա թաքնվում է Ճապոնիայի իշխանություններից, հաղորդում է Associated Press-ը:
Հայտնի է, որ ֆիանսիացի հետաքննիչների թիմը Բեյրութ կժամանի հունվարին, սակայն դեռեւս հայտնի չէ հստակ ամսաթիվը կամ տեղեկատվությունը, որը հետաքննիչները պատրաստվում են ստանալ Գոնից:
Բացի Ճապոնիայում դատական հետապնդման, 66-ամյա բիզնեսմենին կառաջադրվեն մի շարք մեղադրանքներ Ֆրանսիայում, որոնցից են հարկերը չվճարելը, փոխերի լվացումը, խարդախությունը եւ ընկերության ակտիվների չարաշահումը:
Կառլոս Գոնը, որը գտնվում էր Տոկիոյում տնային կալանքում, դեկտեմբերի վերջում փախել էր: Նա մասնավոր ինքնաթիռով Ստամբուլով հասել էր Բեյրութ, որտեղից պաշտոնապես հայտարարել իր գտնվելու վայրի մասին: Ճապոնական կողմը պահանջում է արտահանձնել Գոնին վերջինիս ձերբակալելու համար:
Գոնը ձերբակալվել է 2018 թվականի նոյեմբերի 19-ին կասկածանքով, որ չի հայտարարագրել բոլոր իր եկամուտները: Բացի այդ Գոնը կասկածվում է, որ մարել է ընկերության հաշվին կորուստները, որոնք նրան հասցվել էին մասնավոր ներդրումների արդյունքում: Այդ վնասը կազմել է շուրջ 21 միլիոն դոլար:
Անցած տարվա գարնանը Գոնի փաստաբանները շուրջ 15 միլիոն դոլարի չափով գրավ էին ներդրել, որից հետո Գոնին ազատ էին արձակել երկրից չհեռանալու մասին պայմանով: Նախքան դատը, որը պետք է կայանար Ճապոնիայում 2020 թվականի գարնանը, նա իրավունք չուներ լքել երկիրը:
