ՆԱՏՕ-ն մտադիր բարելավել իր հնարավորությունները` կենսաբանական զենքի կիրառմամբ հարձակումների սպառնալիքի կանխման համար: Այս մասին հայտարարել է դաշինքի գլխավոր քարտուղար Յենս Ստոլտենբերգը երեքշաբթի օրը հրապարակված DPA գործակալությանը տված հարցազրույցում:
«Մենք զորքեր ունենք, որոնք մասնագիտանում են սպառնալիքների դեմ կենսաբանական զենքի կիրառման գործում, եւ դրանք մեր զորավարժությունների մի մասն են: Բայց մենք պետք է բարելավենք մեր կարողություններն այս ոլորտում»,- ասել է նա: Մասնավորապես, նրա խոսքով, ՆԱՏՕ-ն աշխատում է գործընկեր երկրների հետախուզական ծառայությունների միջեւ տվյալների փոխանակման բարելավման ուղղությամբ:
Ստոլտենբերգը նշել է, որ համավարակը ցույց տվեց այս ուղղությամբ ջանքերի ակտիվացման անհրաժեշտությունը` չնայած որ կորոնավիրուսը, նրա խոսքով, «բնական ծագում ունի»: «Սա լաբորատորիայում ստեղծված վիրուս չէ, բայց, իհարկե, ցույց տվեց այն սպառնալիքները, որոնք առաջանում են կենսաբանական նյութերի օգտագործման դեպքում»,- ասել է գլխավոր քարտուղարը: «Այս զենքը, ինչպես եւ քիմիական զենքը, արգելված է միջազգային օրենսդրությամբ, սակայն մենք պետք է պատրաստ լինենք դրա օգտագործմանը, քանի որ գիտենք, որ այդ զենքը դեռ գոյություն ունի, եւ պետական խաղացողների եւ ահաբեկիչների կողմից դրա օգտագործման վտանգ կա»,- կարծում է նա:
Նրա խոսքով` նման հարձակման դեպքում ՆԱՏՕ-ն անմիջապես պատասխան գործողություններ կձեռնարկի` կախված հարձակման մասշտաբից: «ՆԱՏՕ-ն արգելված զենք չունի, սակայն մենք դրան համամասնորեն արձագանքելու մի շարք հնարավորություններ ունենք: Եթե մենք ակտիվացնենք [Հյուսիսատլանտյան դաշնագրի] 5-րդ հոդվածը կոլեկտիվ պաշտպանության մասին, ապա մենք կօգտագործենք մեր ունեցած հնարավորությունները»,- ասել է Ստոլտենբերգը: