ՆԱՏՕ-ն չի տեսնում Ռուսաստանի մեջ միության համար անմիջական ռազմական վտանգ: Այդ մասին հինգշաբթի հայտարարել է ՆԱՏՕ-ի գլխավոր քարտուղար Յենս Ստոլտենբերգը, հաղորդում է ՏԱՍՍ-ը:
«Ես չեմ տեսնում անմիջական սպառնալիք, որը բխում է Ռուսաստանից ռազմական հարձակման տեսքով,-ասել է նա:-Սակայն ես տեսնում եմ Ռուսաստան, որն ամրապնդում է իր դիրքերը: Այն օգտագործում է իր ռազմական ուժն ընդդեմ հարեւանների՝ Վրաստանի եւ Ուկրաինայի»,-հավելել է Ստոլտենբերգը:
ՆԱՏՕ-ի գլխավոր քարտուղարի պնդմամբ՝ Մոսկվան էր կանգնած Գերմանիայի եւ Նորվեգիայի խորհրդարանների դեմ կիբերհարձակումների հետեւում: Ստոլտենբերգը հերթական անգամ մեղադրել է Ռուսաստանին Մեծ Բրիտանիայում մարդասպանությունների համար քիմիական նյութեր օգտագործելու մեջ: «Ռուսաստանն ունի միջուկային զենք ու հրթիռներ, որոնք կարող են հասնել Եվրոպայի ամբողջ տարածքին»,-ասել է միության ղեկավարը:
Ստոլտենբերգը քննադատել է Թուրքիայի՝ ռուսական Ս-400 զենիթահրթիռային համակարգեր ձեռքբերելու որոշումը: «Սակայն ես գիտեմ, որ Թուրքիան կարեւոր դաշնակից է: Նա ունի ռազմավարական աշխարհագրական դիրք»,-հավելել է նա՝ ընդգծելով, որ կարեւոր է պահպանել Թուրքիային միության կազմում:
