Հայաստանում անհրաժեշտ է կարգավորվել գյուտերի ստեղծման, պաշտպանության եւ օգտագործման հետ կապված գույքային եւ անձնական հարաբերությունները: Այս մասին ԱԺ տնտեսական հարցերի մշտական հանձնաժողովի նիստում «Լիցենզավորման մասին» եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթի քննարկման ժամանակ հայտարարեց ՀՀ էկոնոմիկայի նախարարի տեղակալ Վարոս Սիմոնյանը:
Նրա խոսքով՝ փաթեթում հաշվի են առնվել պարտավորությունները, որոնք ստանձնել եւ ընդունել է Հայաստանը միջազգային համապատասխան համաձայնությունների շրջանակում: Օրենքները, մասնավորապես, համապատասխանեցվում են արդյունաբերական սեփականության պահպանության մասին Փարիզյան կոնվենցիային, ինտելեկտուալ սեփականության Համաշխարհային կազմակերպության փաստաթղթերին, Եվրասիական արտոնագրային կոնվենցիային, ինտելեկտուալ սեփականության իրավունքների առեւտրային ասպեկտների հարցով համաձայնագրին:
«Գյուտերի գրանցման, պաշտպանության եւ օգտագործման հետ կապված հարցերով կզբաղվի լիազորված պետական մարմինը, որին առընթեր կգործի Բողոքարկման կոլեգիա: Գյուտի արտոնագիր կտրվի կազմակերպություններին, ֆիզիկական անձանց եւ անհատ ձեռնարկատերերին»,-պարզաբանեց փոխնախարարը:
Ընդ որում, արտոնագիրը կկրի ինչպես կարճաժամկետ բնույթ՝ 10 տարի ժամկետով, այնպես էլ երկարաժամկետ՝ 20 տարի ժամկետով: Միջազգային մասշտաբով դրանց գրանցման համար կպահանջվի միջազգային հայտ, որը տրվում է պետական լիազորված մարմին: ՀՀ գործող օրենսդրության նորմերին հակասության դեպքում կկիրառվեն միջազգային պայմանագրերի նորմեր:
Հայաստանի տարածքում գյուտի իրավունքը ձեռք կբերվի եւ կպահպանվի արտոնագրով, որը տրվել է սահմանված օրինական կարգով:
Եվրասիական արտոնագրից բխող իրավունքները ճանաչվում եւ պահպանվում են ՀՀ տարածքում Եվրասիական արտոնագրային կոնվենցիային համապատասխան: ՀՀ-ում գյուտերի իրավական պահպանությունն իրականացվում է պահպանվող փաստաթղթերի հիման վրա, որոնք տրվել են գործող օրենսդրությանը, ինչպես նաեւ եվրասիական արտոնագրին համապատասխան:
Որոշ քննարկումներից հետո հանձնաժողովը դրական եզրակացություն տվեց տվյալ օրենսդրական նախաձեռնությանը: