Հավկիթի գնի աճը պայմանավորված է նրանով, որ չենք հասցրել կենդանի թռչնի նոր խմբաքանակ ներմուծել արտադրությունը թարմացնելու համար: Եթե գլխաքանակը չի թարմացվում, ապա ընկնում է հավկիթի արտադրողականությունը: Այս մասին NEWS.am-ի հետ զրույցում ասաց Թռչնաբույծների միության նախագահ Սերգեյ Ստեփանյանը:
«Մենք ինչ-որ կերպ կարողացել ենք ներմուծել ինկուբացիոն հավկիթ եւ ճուտ, որպեսզի դեկտեմբերի սկզբին ապահովենք հավկիթի արտադրության աճը: Դա թույլ է տվել կանգնեցնել գնաճը եւ նույնիսկ նվազեցնել գինը 2-3 դրամով: Ինչ վերաբերում է թռչնամսին, ապա այս տարի գները չեն բարձրացրել, եւ արտադրողներն այն վաճառում են մեկ կիլոգրամը 1260-1290 դրամով»,-նշեց նա:
Փորձագետը շարունակեց, որ հավկիթի մասով Հայաստանը լիովին ինքնաբավ է, իսկ մսի արտադրության մասով կա աճի միտում, սակայն խնդիրն այն է, որ ավելանում է արտադրանքի ինքնարժեքն ու դրան զուգահեռ ընկնում է բնակչության վճարունակությունը:
«Բացասական ազդեցություն ունեն այնպիսի գործոններ, ինչպիսիք են՝ կերի գների աճ, էներգակիրների թանկացում, արժույթի փոխարժեքի տատանում, ինչպես նաեւ գների ընդհանուր աճ: Թռչնամսի արտադրության ոլորտում ամենագլխավոր խնդիրը ներմուծվող մսի (25 տոկոս) ցածր մաքսատուրքերն են, որն ավելի էժան է, քան տեղական արտադրանքը, եւ, բնականաբար, դա ազդում է պահանջարկի վրա, քանի որ նման պայմաններում տեղականը քիչ մրցունակ է դառնում: 2020 թվականին ծրագրվում է ԵԱՏՄ շրջանակում մաքսատուրքն ավելացնել մինչեւ 50 տոկոս, սակայն հաշվի առնելով առկա դժվարությունները, որոշում է կայացվել թողնել ամեն ինչ առանց փոփոխությունների: Արտադրողի համար չափազանց կարեւոր է կայունությունը, քանի որ տնտեսվարող սուբյեկտն իր հաշվարկները կատարում է 1 տարվա համար, իսկ կերի պաշարների համար՝ 2-3 ամսվա: Ներկայիս իրավիճակում բիզնեսի համար բարդ է կողմնորոշվել: Այդ առումով պետության դերը կայանում է նրանում, որպեսզի, օրինակ, մեկ տարվա ընթացքում թույլ չտա էներգակիրների գնի աճ եւ անսպասելի ու կտրուկ փոփոխություններ չսահմանի հարկային ոլորտում բիզնեսի համար: Այժմ անհնար է նույնիսկ կանխատեսել, քանի որ կայունություն չկա: Այսօր մենք ամբողջությամբ կախված ենք Վերին Լարսի անցակետից, որը մինչեւ մարտի վերջ փակ է: Սակայն նույնիսկ այդ պայմաններում մեզ հաջողվեց նորմալ փակել տարին»,-նշեց Ստեփանյանը:
Փորձագետը պարզաբանեց, որ հավկիթի եւ թռչնամսի արտադրության ամենաբարձ ցուցանիշները գրանցվել են 2019-ին, երբ 2018-ի համեմատ հավկիթի արտադրությունը գրանցել է 10-տոկոսանոց աճ, ինչը հանգեցրել է գների անկման: 2020 թվականին, նրա խոսքով, աճը կազմել է ընդամենը 2 տոկոս, 2019-ին՝ 9 տոկոս: 2020 թվականին թռչնամսի արտադրության ծավալներն աննշան նվազել են:
