Իրանն ու Ադրբեջանը մեծ հնարավորություններ ունեն տնտեսական ոլորտում համագործակցության հետագա ընդլայնման համար: Այս մասին հայտարարել է Իրանի խորհրդարանի խոսնակի հատուկ օգնական Հոսեյն Ամիր-Աբդոլլահյանը Թեհրանում Ադրբեջանի դեսպան Բունյադ Հուսեյնովի հետ հանդիպմանը, փոխանցում է Mehr-ը:

Նշելով «ղարաբաղյան հակամարտության ժամանակ Ադրբեջանի տարածքային ամբողջականությանը» Թեհրանի աջակցության մասին, Ամիր-Աբդոլլահյանը հույս է հայտնել, որ «այս հակամարտության ավարտը տարածաշրջան կբերի խաղաղություն եւ կայունություն»: Նրա խոսքով՝ իրանական ընկերությունները շինարարական հատվածում ինժեներական մեծ ներուժ ունեն եւ կարող են Բաքվին օգնել Ղարաբաղի վերականգնման գործում, իսկ Իրանի եւ ադրբեջանական շրջանների միջեւ ոչ մեծ հեռավորությունը իրանական ընկերություններին առավելություն է տալիս:

Նա նաեւ նշել է, որ Ադրբեջանում սիոնիստական ռեժիմի ներկայությունը հակասում է խաղաղությանն ու անվտանգությանը:

Կողմերը նաեւ կարծիքներ են փոխանակել տարածաշրջանային իրադարձությունների եւ փոխադարձ շահ ներկայացնող ոլորտներում համագործակցության ընդլայնման ուղիների շուրջ: