Քաղաքակիրթ աշխարհը պետք է միավորվի եւ պարտավորեցնի Բաքվին վերադարձնել Հայաստանից ու Ղարաբաղից ռազմագերիներին ու գերության մեջ պահվող անձանց: Այդ մասին հունվարի 21-ին՝ ԱԺ ավանդական ճեպազրույցների ժամանակ, հայտարարել է «Լուսավոր Հայաստան» կուսակցության եւ խորհրդարանական խմբակցության ղեկավար Էդմոն Մարուքյանը:
Նրա խոսքով՝ Հայաստանի եւ Ռուսաստանի՝ որպես ԵԱՀԿ Մինսկի խմբի համանախագահ երկրի ջանքերին պետք է միանան ԱՄՆ-ն եւ Ֆրանսիան: Բացի այդ, քաղաքական գործչի կարծիքով, այդ ցանկը պետք է ընդլայնվի ԵՄ-ի եւ բազմաթիվ այլ երկրների հաշվին:
Մարուքյանն ընդգծել է, որ անհրաժեշտ է կոնսոլիդացնել ամբողջ միջազգային հանրությունը գերիներին վերադարձնելու հարցի շուրջ ընդհուպ մինչեւ Ադրբեջանի վրա ճնշման ավելացումն եւ պատժամիջոցների կիրառումը:
Խորհրդարանական դաշինքի ղեկավարը նաեւ հայտարարել է, որ նրանք պատրաստվում են մեկնել Ստրասբուրգ եւ այդպես ակտիվորեն աշխատել ռազմագերիներին վերադարձնելու ուղղությամբ՝ այդ խնդիրը դարձնելով արտահերթ քննարկումների թեմա: «Մենք կանենք ամեն ինչ, որ Եվրոպայի Խորհրդի Խորհրդարանական ասամբլեայի 45 երկրները միավորվեն այդ պահանջի շուրջ»,-հավաստիացրել է Մարուքյանը: