Ես տարբեր հանձնախմբերում մասնակցում եմ նիստերին, տարբեր գործողություններ ենք իրականացնում 17+-ի ձեւաչափում եւ որեւէ տարաձայնություն չեմ տեսել ԲՀԿ-ի հետ: Այս մասին, այսօր՝ հունվարի 22-ին, ԱԺ-ի դիմաց բողոքի ակցիայի ժամանակ լրագրողների հետ զրույցում նշեց «Հայրենիք» կուսակցության անդամ Արսեն Բաբայանը՝ անդրադառնալով լուրերին, թե ԲՀԿ-ի եւ «Հայրենիքի փրկության շարժման» միջեւ տարաձայնություններ կան:
«Մենք այսօր հավաքվել ենք այստեղ, որ թուրքա-ադրբեջանական ուսապարկերի ժողովին բացատրենք, որ չի կարելի այն դեպքոեւմ, երբ դուք ունեք բազմաթիվ գերիներ, որոնց անուններն անգամ չգիտեք, հավաքվել եք այստեղ ու ԲԴԽ անդամներ եք ընտրում: Նույնիսկ չխխոսենք թեկնածուներից, թեեւ այնտեղ մի անձ կա, որ բացի նրանից, որ «Սորոսի հիմնադրամի» տնօրենների խորհրդում գլխավոր տնօրենի պաշտոն է զբաղեցնում, նաեւ ՀՔԾ պետ Սասուն Խաչատրյանի հարազատ եղբայրն է: Հավանաբար Սասուն Խաչատրյանի «անուրանալի» ծառայությունների համար նրա եղբորը փորձում են վարձահատույց լինել:
Այս իշխանությունը փորձում է ցույց տալ, թե Հայաստանում պատերազմից հետո չկան խնդիրներ: Վերջերս էլ ընդունեցին մի օրենք, որով ստեղծում են նոր դատարան, որը կանալավորումների, ձերբակալությունների միջնորդությունների քննությունը պետք է իրականացնի: Մենք ունենք լավ դատավորներ, հիմա ԲԴԽ-ի միջոցով փորձելու են այդ դատավորներին նկատմամբ ճնշում գործադրել: Սա չի կարելի թույլ տալ»,-ասաց նա:
Հիշեցնենք, որ քաղաքացիները բողոքի ակցիա էին անում ԱԺ-ի դիմաց՝ ԲԴԽ անդամների ընտրության դեմ։ Նշենք, որ խորհրդարանն այսօր ընտրում է ԲԴԽ անդամների։ Քաղաքացիները նշում են, որ մեր երկրում կան ավելի առաջնային խնդիրներ, ինչպիսիք են գերիների վերադարձն ու զոհվածների մարմինները գտնելը։ Սակայն իշխանությունը շտապում է ընտրել իրեն հաճո ԲԴԽ անդամներ՝ անկախ դատավորին վերջնականապես ճնշելու համար։