Սաուդյան Արաբիայի Կենտրոնական բանկը բանկերի աշխատակիցների մասնակցությամբ կոռուպցիոն սխեմա է բացահայտել, որի օգնությամբ 11.5 միլիարդ սաուդյան ռիալ (ավելի քան 3 միլիարդ դոլար) է ապօրինի կերպով փոխանցվել արտասահմանյան հաշվեհամարներին: Այս մասին հայտնել է Թագավորության վերահսկողության եւ կոռուպցիայի դեմ պայքարի գրասենյակի պաշտոնական ներկայացուցիչ Ահմեդ ալ-Հուսեյնը, փոխանցում է ՏԱՍՍ-ը` վկայակոչելով Al Arabiya հեռուստաալիքը:
Նրա խոսքով` ֆինանսական հանցագործությունը հնարավոր է եղել բացահայտել կենտրոնական բանկի վերահսկողական քաղաքականության եւ կառավարման մասնագետների արհեստավարժության շնորհիվ:
Ալ-Հուսեյնը նշել է, որ հանցագործությունը բացահայտվել է, հանցագործները կալանավորվել են, նրանք մեղադրվում են կաշառք վերցնելու, փաստաթղթեր կեղծելու եւ մի շարք այլ հանցագործությունների մեջ: Հանցանքի ծանրությունից կախված` մեղադրյալներին մինչեւ 15 տարվա ազատազրկում է սպառնում:
