Փետրվարի 10-ին հրավիրվել են Արցախի Հանրապետության Ազգային ժողովի «Միասնական հայրենիք», «Հայ հեղափոխական դաշնակցություն», «Արցախի ժողովրդավարական կուսակցություն» եւ «Ազատ հայրենիք-ՔՄԴ» խմբակցությունների նիստեր: Խմբակցությունները հանդիպել են գլխավոր դատախազի թեկնածու Գուրգեն Ներսիսյանին եւ քննարկել նրա թեկնածության հարցը:
Գլխավոր դատախազի պաշտոնի համար Արցախի Հանրապետության նախագահ Արայիկ Հարությունյանն օրեր առաջ Ազգային ժողովի քննարկմանն է առաջարկել Գուրգեն Ներսիսյանի թեկնածությունը:
Հանդիպումների ընթացքում Գուրգեն Ներսիսյանը ներկայացրել է դատախազի պաշտոնում ընտրվելու դեպքում իր ծրագրերն ու առաջիկա քայլերը, շեշտվել է դատախոզության աշխատանքների անկախության,անկողմնակալության ապահովումը:Անդրադարձ է կատարվել հետպատերազմյան իրողություններում դատախազության գործառույթներին,մասնավորապես ռազմական հանցագործությունների վերհանման ուղղությամբ փաստահավաք գործունեությանը:
Կարեւորվել է խորհրդարանի հետ փոխգործակցությունը ,ինչպես օրենսդրական բարեփոխումների, այնպես էլ՝ համակարգում առկա խնդիրների վերհանման առումով:
Պատասխանելով պատգամավորների հարցերին՝ գլխավոր դատախազի թեկնածուն անդրադարձել է համակարգի աշխատանքների կարգավորման եւ բարելավման ուղղություններին,տեսլականին:
2021թվականի փետրվարի 11-ին՝ ժամը 11:00-ին կգումարվի Ազգային ժողովի լիագումար նիստ եւ քննարկման կդրվի նաեւ Արցախի Հանրապետության գլխավոր դատախազի ընտրության մասին հարցը:
