Գերմանիայում ձերբակալված Տաջիկստանի հինգ քաղաքացիների «Իսլամական պետություն» խմբավորմանը անդամակցելու եւ միջոցներ հավաքելու ու մարդկանց հավաքագրելու ճանապարհով ահաբեկչություններ նախապատրաստելու մեղադրանքներ են առաջադրվել, հաղորդում է Reuters-ը:
Դատախազության հայտարարության մեջ նշվում է, որ մեղադրյալներից մեկը, որի անունը Ազիզժոն Բ. է, կասկածվում է Աֆղանստանում ԻՊ երկու բարձրաստիճան ղեկավարների հետ սերտ կապի եւ ԻՊ-ի քարոզչություն տարածելու համար ռուսալեզու ու տաջիկական օնլայն-ցանցերն օգտագործելու մեջ:
Անցյալ տարի ձերբակալված հինգ մարդ կասկածվում էր Հյուսիսային Ռեյն-Վեստֆալիա նահանգի արեւմտյան հողում ԻՊ բջջին պատկանելու մեջ, որի անդամները հրահանգներ եւ նյութեր էին ստացել Գերմանիայում ռումբեր ստեղծելու եւ ահաբեկչություններ ծրագրելու համար:
Նշվում է, որ ցանցը միջոցներ է հավաքել «Իսլամական պետության» գործողությունների համար եւ հավաքագրել հավանական գրոհայինների:
Անցյալ շաբաթ դանիական ոստիկանությունը հայտնել էր, որ ձերբակալել է 13 մարդու, իսկ գերմանական ոստիկանությունը ձերբակալել է եւս մեկ մարդու՝ պայթուցիկ նյութեր պատրաստելու եւ Դանիայում կամ Գերմանիայում ահաբեկչության փորձ կատարելու կասկածանքով: