Հայի կողմից հային ատելն այն է՝ ինչ ուզում է Նիկոլ Փաշինյանը։ Այս մասին այսօր՝ փետրվարի 27-ին, Բաղրամյան պողոտայում կազմակերպված հանրահավաքին հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը։
«Նիկոլի միակ հենարանը մնացել է չարությունը, մաղձը եւ ատելությունը։ Ես միշտ փորձել եմ հասկանալ, թե նվազագույն դաստիարակություն եւ ինտելեկտ, զրո հայրենասիրություն ունեցող այդ մարդն ինչո՞վ է կարողացել 2 տարի առաջ մանիպուլյացնել մեր հարյուրհազարավոր անկեղծ հայրենակիցներին»,- նշեց Զոհրաբյանը։
Նաիրա Զոհրաբյանը մեջբերեց տարածաշրջանային խնդիրների մասին քննարկման ժամանակ Նիկոլ Փաշինյանի կողմից տարիներ առաջ ասված հետեւյալ խոսքերը՝ ե՞րբ պետք է հասկանանք, որ Ղարաբաղը մեզ համար գլխացավանք է, եւ ինչքան շուտ ազատվենք այդ գլխացավանքից՝ այնքան լավ. «Սա ասել է դեռեւս լրագրող եւ խմբագիր Նիկոլ Փաշինյանը 2007 թվականին։ Իր տերերի հետ միասին Նիկոլ Փաշինյանը հետեւողականորեն իրականացրեց Արցախի հանձնման իր ծրագիրը»։
