Սիրիայի արտաքին գործերի եւ էմիգրանտների գործերով նախարարությունը ՄԱԿ Անվտանգության խորհրդին կոչ է արել կատարել իր պարտականությունները եւ անհապաղ միջոցներ ձեռնարկել «սիրիական տարածքում ամերիկյան ագրեսիան կասեցնելու եւ դրանց կրկնությունը կանխելու համար», հաղորդում է ՍԱՆԱ-ն:
«Նախարարությունը նամակ է ուղարկել գլխավոր քարտուղարին եւ ՄԱԿ Անվտանգության խորհրդի նախագահին, որով հաստատել է, որ Վաշինգտոնը խախտել է միջազգային իրավունքի եւ ՄԱԿ կանոնադրության դրույթները, եւ որ ամերիկյան ռազմական ինքնաթիռները երեկ չէ առաջին օրը գնդակոծել են Դեյր-էս-Զորի օբյեկտները՝ սիրիա-իրաքյան սահմանի մոտ: Այս ագրեսիան վերջինն է ԱՄՆ զորքերի կողմից կրկնվող հարձակումների շարքում՝ շինծու պատրվակներով կամ խայտառակ արդարացումներով, որոնցով ԱՄՆ վարչակազմի պաշտոնյաները պարծենում են Վաշինգտոնում իրենց հարթակներից:
Նախարարությունն ընդգծել է, որ այս ագրեսիան հակասում է Ամերիկայի Միացյալ Նահանգների՝ որպես Անվտանգության խորհրդի մշտական անդամի ենթադրվող դերին, որը պատասխանատու է միջազգային խաղաղության եւ անվտանգության պահպանման համար:
Արտաքին քաղաքական գերատեսչությունը նշել է, որ այս ագրեսիան կհանգեցնի տարածաշրջանում լարվածության սրման, քանի որ դա ամերիկյան նոր վարչակազմի բացասական քաղաքականության ցուցանիշ է, որը պետք է համապատասխանի միջազգային օրինականության նորմերին, միջազգային իրավունքին եւ Անվտանգության խորհրդի համապատասխան որոշումներին՝ Սիրիայի Արաբական Հանրապետության տարածքային ամբողջականության, ինքնիշխանության եւ անկախության պահպանման գործում:
Նախարարությունը կրկին կոչ է արել Անվտանգության խորհրդին կատարել միջազգային խաղաղությունն ու անվտանգությունը պահպանելու իր պարտավորությունները եւ անհապաղ միջոցներ ձեռնարկել, որպեսզի իր մշտական անդամը չշարունակի ագրեսիան եւ հանցագործությունները ինքնիշխան պետության եւ ՄԱԿ-ի հիմնադիր անդամի հանդեպ, ինչպես նաեւ կանխել այս ագրեսիվ քաղաքականության կրկնությունը, ինչը հանգեցնում է քաոսի տարածման, սիրիական ենթակառուցվածքների ոչնչացման եւ լարվածության աճի տարածաշրջանում եւ ամբողջ աշխարհում, ինչը ուղղակիորեն համապատասխանում է զինված ահաբեկչական կազմակերպությունների շահերին»,- ասվում է Սիրիայի ԱԳՆ հայտարարության մեջ, որը հայտնվել է ՍԱՆԱ գործակալության տրամադրության տակ: