Եվրախորհրդարանի պատգամավոր Կոստաս Մավրիդեսի (Կիպրոս) նախաձեռնությամբ՝ Եվրախորհրդարանի բոլոր խոշոր խմբակցությունների 30 պատգամավորներ շտապ հարցում են ուղարկել ԵՄ արտաքին գործերի եւ անվտանգության քաղաքականության բարձր ներկայացուցիչ Ժոզեպ Բորելին:
Պատգամավորները, մասնավորապես, խնդրել են տեղեկատվություն հաղորդել այն մասին, թե ԵՄ-ն կոնկրետ ինչ քայլեր է ձեռնարկել Ադրբեջանից հայ ռազմագերիների եւ այլ կալանավորների, այդ թվում`ք աղաքացիական անձանց եւ կանանց, հայրենադարձությունն ապահովելու համար:
Ադրբեջանը շարունակում է պահել բազմաթիվ հայ ռազմագերիների՝ չնայած հրադադարի մասին 2020թ. նոյեմբերի 9-ի եռակողմ հայտարարությանը, որը նախատեսում է բոլոր ռազմագերիների վերադարձ:
Եվրախորհրդարանի պատգամավորները ԵՄ գերագույն հանձնակատարին հարցրել են նաեւ, թե ԵՄ-ն կոնկրետ ինչ քայլեր է ձեռնարկել հայ ռազմագերիների նկատմամբ դաժան վերաբերմունքը, նրանց քաղաքական նպատակներով շահագործումը կանխելու եւ Կարմիր խաչի միջազգային կոմիտեի ներկայացուցիչների այցեր ապահովելու համար:
Եզրափակելով՝ եվրախորհրդարանականները հետաքրքրվել են, թե խնդրո՞ւմ է արդյոք Եվրամիությունը ադրբեջանական կողմին իրեն տրամադրել հայ ռազմագերիների ճշգրիտ թիվը, եւ եթե այո, ապա ինչ տեղեկատվություն է տրամադրվել:
Խոսելով գրավոր հարցման մասին՝ Եվրախորհրդարանի պատգամավոր Կոստաս Մավրիդեսը հայտարարել է.
«Մենք չենք կարող լռել մարդկության դեմ հանցագործությունների առջեւ: Ահա թե ինչու մենք, տարբեր խմբակցությունների եւ ԵՄ անդամ երկրների իմ գործընկերների հետ միասին, ԵՄ-ին կոչ ենք անում հստակ քայլեր ձեռնարկել նախկինում ձեռք բերված եռակողմ համաձայնագրի 8-րդ կետը կյանքի կոչելու ուղղությամբ, մասնավորապես` Ադրբեջանում գերության մեջ գտնվող հայ ռազմագերիների, ներառյալ քաղաքացիական անձանց եւ կանանց վերադարձի մասին: Ադրբեջանը բացահայտ խախտում է միջազգային իրավունքը: Մենք պետք է բարձրացնենք այս զուտ մարդասիրական հարցը»,- ասել է պատգամավորը:
