Առաջընթացի ներկայիս մակարդակի պարագայում պետության եւ կառավարության ղեկավար կանանց եւ տղամարդկանց հավասար մասնաբաժնին հնարավոր կլինի հասնել 130 տարի հետո, ՄԱԿ ԱԽ ոչ պաշտոնական հանդիպման ժամանակ ասել է ՄԱԿ գլխավոր քարտուղարի քաղաքական հարցերով տեղակալ Ռոզմարի ԴիԿառլոն, փոխանցում է «ՌԻԱ Նովոստի»-ն:
«Առաջընթացի ներկայիս մակարդակի պարագայում պետության եւ կառավարության ղեկավարի պաշտոնում սեռերի հավասարության հասնելը կտեւի եւս 130 տարի»,- ասել է ԴիԿառլոն:
Նրա խոսքով՝ ՄԱԿ-ը պետք է օրինակ ծառայի սեռերի հավասարության ապահովման հարցերում: ԴիԿառլոն նշել է, որ ՄԱԿ գլխավոր քարտուղարը կին է նշանակել կազմակերպության հատուկ քաղաքական առաքելությունների ավելի քան 57 տոկոս ղեկավար պաշտոններում, այդ թվում՝ Աֆղանստանում եւ Իրաքում առաքելությունների:
«Մենք հանձնառու ենք ՄԱԿ հովանու ներքո անցկացվող խաղաղ գործընթացներում կանանց կառուցողական մասնակցությանը»,- նշել է նա:
ՄԱԿ գլխավոր քարտուղար Անտոնիո Գուտերեշն ավելի վաղ նշել էր, որ ընդամենը 22 երկրում են կանայք պետության կամ կառավարության ղեկավար: Ընդ որում՝ նախարարների միայն 21 տոկոսն է կին, իսկ կին խորհրդարանականները կազմում են պատգամավորների 25 տոկոսից պակաս:
