Միջերկրական ծովի արեւելյան հատվածում Հունաստանի դեմ իր գործողություններով Թուրքիան խախտել է միջազգային իրավունքը եւ ՆԱՏՕ-ի առջեւ ստանձնած պարտավորությունները: Այս մասին հայտարարել է ԱՄՆ պետքարտուղար Էնթոնի Բլինքենը:
«Երկկողմ վեճերը հարկ է կարգավորել խաղաղ եւ դիվանագիտական ճանապարհով, այլ ոչ ռազմական, եւ իհարկե՝ ոչ սադրիչ գործողությունների ճանապարհով»,- ասել է Բլինքենը Ներկայացուցիչների պալատի արտաքին գործերով կոմիտեում, հայտնում է Greek City Times-ը: «Մենք քննադատել ենք այն գործողությունները, այդ թվում՝ Թուրքիայի, որոնք խախտում են միջազգային իրավունքը եւ ՆԱՏՕ-ի առջեւ նրա պարտավորությունները, այդ թվում՝ նրա սադրիչ գործողությունները Հունաստանի դեմ եւ նրա օդային տարածքի խախտումները»,- նշել է նա:
Բլինքենի խոսքով՝ Միացյալ Նահանգները ողջունում է տարաձայնությունների լուծման համար Աթենքի եւ Անկարայի միջեւ դիվանագիտական շփումների վերսկսումը:
Նա նշել է, որ Եվրամիության եւ մյուս երկրների հետ Թուրքիայի համագործակցության վերսկսումը ավելի արդյունավետորեն է օգնել լարվածության նվազեցմանը: Բլինքենը շեշտել է, որ Միացյալ Նահանգները մտահոգությամբ է հետեւում Միջերկրական ծովի արեւելյան հատվածում իրավիճակին: Նրա խոսքով՝ Վաշինգտոնը պետք է ակտիվ դեր խաղա այնտեղ կայունության ամրապնդմանը նպաստելու գործում:
Բլինքենը նաեւ ասել է, որ Վաշինգտոնը կաջակցի երկգոտի եւ երկհամայնքային ֆեդերացիայի շրջանակում Կիպրոսի խնդրի երկարաժամկետ լուծմանը: «Մենք ներգրավված կլինենք այս հեռանկարն առաջ մղելու ջանքերում, ներառյալ ՄԱԿ-ի չափազանց կարեւոր դերակատարության աջակցումը, ինչպես նաեւ Ամերիկայի անմիջական մասնակցությունն այդ ջանքերին»,- ասել է նա: «Դուք կտեսնեք, որ ամերիկյան դիվանագիտությունը լիովին ներգրավված է»:
