Դատապարտված հույն ահաբեկիչ Դիմիտրիս Կուֆոդինասը դադարել է 66-օրյա հացադուլը, որի հետեւանքով նա ձեռք է բերել վտանգավոր հիվանդություն, հաղորդում է Associated Press-ը:
63-ամյա Կուգոդինասը, որը դատապարտվել է 11 ցմահ ժամկետով դեռեւս 25 տարի առաջ սպանության համար, որը նա իրագործել էր՝ որպես «նոյեմբերի 17» ձախակողմյա արմատական զինված խմբավորման գլխավոր մարդասպան, սկսել էր հացադուլ՝ պահանջելով տեղափոխել իրեն իր ընտրած բանտը:
Իր փաստաբանի տարածած հայտարարության միջոցով կալանավորը շնորհակալություն է հայտնել «առաջադեմ ժողովրդին», որը համերաշխություն է դրսեւորել «իշխանության անմարդկային համակարգի դեմ պայքարում»:
Վերջին օրերին մի քանի բողոքի ցույց է տեղի ունեցել՝ ի աջակցություն Կուֆոդինասի պահանջների, իսկ նրա կողմնակիցները կազմակերպել են մի շարք հրկիզումներ եւ վանդալիզմի ակտեր:
Կուֆոդինասը նաեւ քննադատել է «իշխող ընտանիքին, որը ցույց է տվել՝ որքան անողոք են՝ ապակայունացնելով օրենքն ու Սահմանադրությունը»:
Այդկերպ նա ակնարկել էր երկրի վարչապետ Կիրիակոս Միցոտաքիսին, որը սերում է քաղաքական գործիչների ընտանիքից: 1989 թվականին Կուֆոդինասն ու եւս մեկ մարդ սպանել են Միցոտաքիսի աներորդուն՝ Պավլոս Բակոյանիսին:
Նրա զոհերն են եղել նաեւ ամերիկացի եւ բրիտանացի զինվորականներ: 2002 թվականին Կուֆոդինասի խմբավորումը ցրվել է, եւ նա հանձնվել է իշխանություններին: