2020 թվականի նոյեմբերի 9-ի հայտարարության համաձայն եւ խաղաղապահ ուժերի տեղակայմամբ ԼՂՀ հակամարտությունը թեւակոխեց նոր փուլ: Այս մասին հայտարարեց Հայաստանի արտգործնախարար Արա Այվազյանը ԵԱՀԿ գործող նախագահ, Շվեդիայի արտգործնախարար Էն Լինդեի հետ ճեպազրույցի ժամանակ Երեւանում:
Նախարարի խոսքով՝ հայկական կողմը հայտարարությունը որպես փաստաթուղթ է դիտարկում, որի նպատակն է վերականգնել զինադադարը: Չնայած այն կարգավորման տարրեր է պարունակում, սակայն ամենակարեւորը բացակայում է՝ կարգավիճակ, որը հիմնված է Արցախի հայերի ինքնորոշման իրավունքի վրա: Կարգավորումն ավարտել հնարավոր է միայն ԵԱՀԿ Մինսկի խմբի համանախագահության շրջանակներում, շեշտեց նախարարը:
Արա Այվազյանը հայտարարեց, որ տարածաշրջանում վերջին զարգացումները ցույց տվեցին Մինսկի խմբի ուժեղ համանախագահության եւ ուժեղ, համածմբված ԵԱՀԿ-ի անհրաժեշտությունը՝ որպես խաղաղության պատասխանատու մարմին: Այս համատեքստում նա նշեց ներկայիս նախագահի անձնական ներկայացուցչի կարեւոր աշխատանքը:
«Հայաստանն ու հայ ժողովուրդը միշտ խաղաղության կողմնակից են: Որպես 20-րդ դարի առաջին ցեղասպանությունը վերապրած ազգ՝ մենք գիտենք խաղաղության եւ անվտանգության գինը: Հայաստանը կարգավորման բոլոր փուլերում հանդես է եկել խաղաղության օգտին: Եվ այսօր նույնպես մենք լիովին գիտակցում ենք այն հնարավորությունները, որը հաշտեցումը կարող է բերել տարածաշրջան: Սակայն խաղաղությունը միայն գեղեցիկ բառերը չեն: Արցախի, հայկական Հադրութի ոչնչացումը, հայկական բնակավայրերի ոչնչացումը եւ դրանց տեղում ադրբեջանական բնակավայրերի կառուցումը չի կարող տեւական եւ ամուր խաղաղություն ապահովել»,- հայտարարեց նախարարը: