Հեղափոխությունից 2,5 տարի հետո ունենք մի իրավիճակ, որ մինչեւ հիմա անհայտ է, թե ովքեր 2008-ի մարտի 1-ին սպանեցին 10 քաղաքացիներին, ով հրաման տվեց գնդակահարել ցուցարարներին փողոցում եւ ինչպես նրանք մահացան: Այս մասին, այսօր՝ մարտի 16-ին, ԱԺ-ում լրագրողների հետ զրույցում նշեց ԱԺ անկախ պատգամավոր Թագուհի Թովմասյանը:
«Այս ընթացքում գլխավոր դատախազությունն ու ՀՔԾ-ն անընդհատ հավաստիացումներ էին տալիս, թե «Մարտի 1»-ի բացահայտմանը խանգարում են այն մի քանի հետախուզվող մարդիկ, հիմա դրանց էլ կբերենք, ամեն ինչ կբացահայտվի, բայց կյանքը ցույց է տալիս, որ այն մարդիկ, որոնք ասում են՝ պատրաստ ենք գալ եւ ցուցմունքներ տալ, ՀՔԾ-ն չի ընդառաջում: Ստացվում է, որ շատ մարդիկ, որ լքեցին Հայաստանը եւ հայտարարում էին, որ քաղաքականհետապնդման են ենթարկվում, եւ այդ հետապնդումը փորձում էին իրենց ձեւակերպմամբ ապացուցել: Այդ պաշտոնյաների մեջ էր նաեւ նախկին գլխավոր դատախազ Գեւորգ Կոստանյանը»,-ասաց Թովմասյանը:
Նա հրապարակեց միջազգային հեղինակավոր քրեական ոստիկանության՝ «Ինտերպոլի» մի փաստաթուղթ, որն ուղղված է ՀՀ Ինտերպոլի ազգային բյուրոյին, որում մասնավորապես, ասվում է. «Խնդրում ենք հաշվի առնել, որ իրավաբանական փորձաքննությունից հետո գլխավոր քարտուղարությունը եկել է այն եզրակացության, որ հետախուզվող անձի մասին ծանուցումը չի չի համապատասխանում ինտերպոլի կանոնադրության 3-րդ հոդվածին»: Իսկ այդ հոդվածում ասվում է. «Կազմակերպությանը խստորեն արգելվում է ձեռնարկել քաղաքական, ռազմական, կրոնական, ռասայական բնույթի որեւէ միջամտություն: Հետեւաբար համապատասխան ծանուցում չի ուղարկվել եւ այդ անձի վերաբերյալ տեղեկությունը՝ Ինտերպոլի դեռեւս 2020-ի ապրիլի 4-ին տվյալների բազայից հանվել է»:
Այսինքն Գեւորգ Կոստանյանի գործը Ինտերպոլը համարել է քաղաքական եւ ըստ էության մերժել է Հայաստանի իրավապահներին հետախուզել Գեւորգ Կոստանյանին: Մինչդեռ մեր դատախազությունն ու ՀՔԾ-ն անընդհատ հյտարարում էին, թե հետախուզում են հայտարարել»,-ասաց Թագուհի Թովմասյանը:
«Ավելին, կոնկրետ դեպքով մերժել են նաեւ մեր երկրի հետ համագործակցել: Սա արդեն լուրջ բան է: Ինտերպոլի գլխավոր քարտուղարությունը կոչ է արել Հայաստանի իրավապահներին անձի նկատմամբ չօգտագործել Ինտերպոլի խողովակները եւ չպահանջել նրա հետախուզումը»,-հավելեց նա:
Պատգամավորը հրապարակեց նաեւ երկրորդ փաստաթուղթը, որով Ինտերբոլի գլխավոր քարտուղարությունն իր բոլոր երկրներում գտնվողն ստորաբաժանումներին, որպեսզի Գեւորգ Կոստանյանի վերաբերյալ տվյալները հանվեն Ինտերպոլի բազայից: Այդ երկրորդ փաստաթղթում նշվում է, որ Ինտերպոլի քարտուղարությունը մերժել է Ինտերպոլի հայաստանյան բյուրոյիկողմից Գեւորգ Կոստանյանի կողմից հայցված կարմիր ծանուցագիրը:
Թագուհի Թովմասյանը նկատեց, որ փաստորեն ՀՀ գլխավոր դատախազությունն ու ՀՔԾ-ն երկար ժամանակ մեզ ստել են. «Նախ, կա ակնհայտ քաղաքական նրբերանք, որը նկատել է Ինտերպոլը, եւ երկրորդ, փաստորեն, այն մեղադրանքները, որ ասում էին՝ միջազգային բոլոր փաստաթղթերով հիմնավորված են, ըստ էության, այդքան էլ այդպես չէ:
Փաստորեն, մենք «Մարտի 1»-ի գործով ունենք քաղաքական հետապնդվողներ: Այսինքն մենք սրա համա՞ր էինք հեղափոխություն անում, որ ունենքն քաղաքական հետապնդվողներ: Թե՞ մենք «Մարտի 1»-ը բացահայտում ենք քաղաքական հետապնդվողների շարժառիթներով, բա մյուսնե՞րը: Միակ բանը, որ «Մարտի 1»-ի գործով բացահայտված է, դա այն է, որ ունեն քաղաքական հալածյալներ: Սա շառաչուն ապտակ է, որ միջազգային ոստիկանությունը տվեց ոչ թե դատախազությանը կամ ՀՔԾ-ին, այլ մեր երկրին: Սա մեր ամոթն է»,-ասաց նա:
«Փաստորեն մեկ տարի առաջ՝ 2020-ի ապրիլին Ինտերպոլը մերժել է նախկին գլխավոր դատախազ Գեւորգ Կոստանյանի հետախուզումը, մինչդեռ մեր իրավապահները այսքան ժամանակ ստել են, թե նա հետախուզման մեջ է. ես չգիտեմ՝ վարչապետը գիտի այս մասին, թե ոչ:
Ես կարծում եմ՝ սա պետք է ունենա ուղիղ իրավական հետեւանք եւ այո, պատասխանատուները պետք է նաեւ քրեական պատասխանատվության ենթարկվեն, որովհետեւ մենք չենք կարող այսպիսի խայտառակ փաստաթուղթ ունենանք, բայց էդ մարդիկ ազատ շրջեն»,-ասաց նա:
Թագուհի Թովմասյանը նկատեց, որ Նիկոլ Փաինյանը հայտարարում է, որ «Մարտի 1»-ի գործը ամբողջությամբ չի բացահայտվում, որովհետեւ մարդիկ փախել են երկրից. «Հիմա պարզվում է, որ ոչ թե մարդիկ փախել են, այլ իրենց մերժել են, ասել են՝ դուք զբաղված եք քաղաքական հետապնդում իրականացնելով»:
