Ամերիկյան 21 նահանգի իշխանությունները դատական հայց են ներկայացրել նախագահ Ջո Բայդենի վարչակազմի դեմ, նրանք պահանջում են չեղյալ հայտարարել Կանադայից Միացյալ Նահանգներ Keystone XL խողովակաշարի շինարարությունը դադարեցնելու որոշումը: Հայցը ներկայացվել է Տեխասի հարավային շրջանի դաշնային շրջանային դատարան, հաղորդվում է դրա տվյալների էլեկտրոնային բազայում, փոխանցում է ՏԱՍՍ-ը:
Բայդենը հունվարին պաշտոնը ստանձնելուց հետո առնվազն 15 հրամանագիր է ստորագրել: Դրանց թվում էր նաեւ Keystone XL նավթատարի շինարարության չեղարկման հրամանը: Հայցվորները պնդում են, որ Ամերիկայի նոր ղեկավարը որոշում կայացնելիս գերազանցել է իր լիազորությունները: Նրանք պահանջում են համապատասխան հրամանագիրը հակասահմանադրական ճանաչել եւ չեղյալ հայտարարել:
Հայցի ներկայացման նախաձեռնողները Տեխաս եւ Մոնտանա նահանգների գլխավոր դատախազներն են: Նրանք շեշտում են, որ խողովակաշարի շինարարությունը չեղյալ հայտարարելու պատճառով Մոնտանա, Հարավային Դակոտա, Նեբրասկա եւ Կանզաս նահանգներում առնվազն 12 հազար մարդ չի կարողանա աշխատանք գտնել: Բազմաթիվ նահանգների իշխանություններ կզրկվեն հնարավոր շահույթներից: Հայցվորների կարծիքով՝ Keystone XL-ի կառուցման հարցը պետք է համաձայնեցված լիներ ԱՄՆ Կոնգրեսի հետ:
«Իր պաշտոնավարման առաջին իսկ օրվանից նախագահ Բայդենն իր առջեւ խնդիր է դրել չեղյալ հայտարարել նախորդ վարչակազմի բոլոր հաջողությունները՝լիովին անտեսելով իր իշխանության սահմանադրական սահմանափակումները»,- ասվում է Տեխասի գլխավոր դատախազ Քեն Փաքսթոնի կայքում տեղադրված գրառման մեջ: Նա ամերիկյան առաջնորդի՝ խողովակաշարի կառուցման թույլտվությունը հետ կանչելու որոշումն ապօրինի է անվանել:
Կանադայի վարչապետ Ջասթին Թրյուդոն ավելի վաղ հայտարարել էր, որ Օտտավան հիասթափված է Keystone XL-ի վերաբերյալ Բայդենի որոշումից: Ենթադրվում էր, որ խողովակաշարը թույլ կտար օրական Կանադայից ավելի քան 800 հազար բարել նավթ մատակարարել ամերիկյան Տեխաս եւ Լուիզիանա նահանգների նավթավերամշակման գործարաններ: