«Գովազդի մասին» օրենքում փոփոխություններ կատարելու մասին օրինագծի ընդունումը կհանգեցնի լրատվամիջոցների ֆինանսական վիճակի վատթարացմանը եւ, որպես հետեւանք, հարված կհասցնի նրանց անկախությանը: Այս մասին մարտի 25-ին NEWS.am-ի թղթակցի հետ զրույցում ասաց քաղաքագետ, «Մեդիա պաշտպան» նախաձեռնության ղեկավար Աղասի Ենոքյանը:
«Այսինքն՝ կամ լրատվամիջոցները ստիպված կլինեն թակել իշխանությունների կամ նրանց մերձավոր օլիգարխների դռները, կամ նրանք պարզապես կփակվեն: Իշխանությունների փաստարկն այն է, որ խաղադրույքները բացասական ազդեցություն են ունենում բնակչության վրա»,- ընդգծեց նա: Սակայն եթե նայեք Հայաստանի տնտեսական վիճակին, ապա, ինչպես նշեց փորձագետը, այն աղետալի վիճակում է: «Հայտնի է, որ երբ բիզնեսը գտնվում է ծանր վիճակում, առաջին բանը, որ անում է, կրճատում է գովազդի ծախսերը: Այս առումով գովազդների քանակը զգալիորեն նվազել է ոչ միայն Հայաստանում, այլեւ ամբողջ աշխարհում, քանի որ վճարունակությունը նվազել է ամենուր: Ուստի Հայաստանում ներկայացված միջազգային ընկերությունները սնանկացումից խուսափելու համար ձգտում են գումար չծախսել գովազդի վրա»,- հավելեց Ենոքյանը: Նշենք, որ Հայաստանի իշխանությունները մտադիր են էլեկտրոնային լրատվամիջոցներում խաղադրույքների գովազդը թույլատրել միայն 22:00 - 07:00:
