Ղարաբաղում ողբերգությունը չի ավարտվի, քանի դեռ մարդիկ մնում են գերության մեջ: Այս մասին հայտարարել է Ֆրանսիայի պատվիրակ Ալեքսանդրա Լուիսը՝ ելույթ ունենալով ԵԽԽՎ գարնանային նստաշրջանում:
«Մենք չպետք է սահմանափակվենք դեկլարացիաներով: 2020 թվականի նոյեմբերին բոլոր ռազմագերիների ազատման պայմանավորվածություն է ձեռք բերվել: Հայաստանը հարգել է այս պայմանավորվածությունը, սակայն Ադրբեջանը հրաժարվել է ազատ արձակել շուրջ 200 հայ ռազմագերիների: Սա միջազգային իրավունքի, մասնավորապես Ժնեւյան կոնվենցիայի ակնհայտ խախտում է»,- ասել է նա:
Նրա խոսքով՝ Ադրբեջանը հայտարարում է, որ այդ մարդիկ գերեվարվել են ռազմական գործողությունների ավարտից հետո, հետեւաբար նրանք «ահաբեկիչներ» են, բայց «այդ մարդիկ ռազմագերիներ են, եւ նրանք պետք է վերադարձվեն հայրենիք»: «Նրանք, ամենայն հավանականությամբ, ենթարկվել են անմարդկային վերաբերմունքի: Մենք տեսել ենք Amnesty International-ի կողմից հրապարակված տեսանյութերը: ՄԻԵԴ-ը տեղեկատվություն է խնդրել կալանքի պայմանների վերաբերյալ եւ պատասխան չի ստացել: Սա նույնպես կասկածներ է առաջացնում»,- նշել է նա:
