Սյունիքում երեկ տեղի ունեցած դեպքերի բերումով այս պահին բերման ենթարկվածները 16-ն են, նրանցից մեկը՝ Մեղրու համայնքապետ Մխիթար Զաքարյանը, ինքնակամ է ներկայացել: Մենք ներսում մի քանի գործողությունների մասնակիցը եղանք, ինչպես հասկացանք բոլորին նույն հոդվածով ձերբակալման որոշում կար. Քննչական կոմիտեի դիմաց լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Շաքե Իսայանը:
Պատգամավորը նշեց, որ ձերբակալվածները Սյունիքի մարզից են՝ Գորիս, Կապան, Մեղրի, Ագարակ, Շուռնուխ, Որոտան:
«Քաղաքացիները մեզ տեղեկացրեցին, որ բերման ենթարկելուց, մասնավորապես երկուսի նկատմամբ անհամաչափ ուժ է կիրառվել: Մի մասին բերման են ենթարկել ԱԱԾ ստորաբաժանման աշխատակիցները, մի մասին՝ Քրեական ոստիկանության աշխատակիցները: Տնից տեղափոխել են Կապանի Ոստիկանության բաժին, այնտեղից տեղափոխել են Երևան: Փաստաբաններն արձանագրում են, որ առավոտյան 6:30-7:00-ին բերման են ենթարկվել, բայց րոպեներ առաջ են կարգավիճակ ստացել, փաստացի 7-8 ժամ ապօրինի կերպով էին պահվում»,– ասաց նա:
Շաքե Իսայանը նշեց, որ ձերբակալվածներից մեկի ինքնազգացողությունը վատացել է, կորոնավիրուսի թեստ չի հանձնել, սակայն ակնհայտ երևում է, որ իրեն լավ չի զգում:
«Մեղրու համայնքապետը մեզ փոխանցեց, որ մամուլում տեղեկատվություն լինելուց հետո, ինքը՝ փաստաբանի հետ, մոտեցել է Ոստիկանության բաժին, ՀՀ փոխոստիկանապետը, ով ներկա է եղել Մեղրու Ոստիկանության բաժանմանքում Մխիթար Զաքարյանին հավաստել են, որ որևէ քրեական գործի հետ առնչություն չունի և իր անձի հետ կապված խնդիր չկա, սակայն մեկ ժամ հետո, նրա հավաստմամբ՝ իր տան դուռը Ոստիկանության աշխատակիցները թակել են և ասել են, որ հրավիրում են Ոստիկանություն:
Շաքե Իսայանը նշեց, որ Քննչական ծառայությունում են Մեղրու, Գորիսի փոխքաղաքապետերը, Գորիսի կոմունալ բաժնի պետը:
«Փաստացի ՀՀ քաղաքացին մոտ 9 ժամ ապօրինի պահվել է այս շենքում, պարտավոր ենք ֆիքսել, որ փոխքաղաքապետին մինչև բերման ենթարկելը, ինչպես իրենք են պնդում, Ոստիկանության աշխատակիցները ծեծի են ենթարկել, իսկ որ ծեծի էր ենթարկվել, դա ակնհայտ էր»:
