Ես կարծում եմ, որ դրանք ակցիաներ էին ուղեկցված խուլիգանական դրսեւորումներով. Սա է իմ մեկնաբանությունը Սյունիքում կատարվածի վերաբերյալ: Այս մասին, այսօր՝ ապրիլի 23-ին, ԱԺ-ում լրագրողների հետ զրույցում հայտարարել է «Իմ քայլը» խմբակցության ղեկավար Լիլիթ Մակունցը:
Հարցին, թե արդյոք այդ ակցիաների մասնակիցների մեջ չկային մարդիկ, որոնք կորցրել էին տուն, թշնամուց շատ մոտ են ապրում, Մակունցը պատասխանեց. «Դժգոհելու առիթ միշտ կա եւ միշտ էլ ինելու է բոլոր իշխանությունների պարագաներում: Այստեղ այլ հարց է. կա որոշակի միտում Հայաստանը բաժանելու մասերի: Դա նկատվում է այո, ուղղորդված խմբակների կողմից, որը չի կարող ընդունելի լինել որեւ երկրի քաղաքական ղեկավարների եւ իրավապահ համակարգի կողմից»:
Լրագրողի հարցին, թե ով է փորձում մասերի բաժանել երկիրը, Մակունցն ասաց, որ չի կարող անուններ հնչեցնել, որովհետեւ չգիտի. «Բայց կողքից հետեւելով իրադարձություններին եւ տեսնելով ինչպիսի գործողություններ են ծավալվում, ես ունեմ տպավորություն, որ այդ ամենն ուղղորդված է: Չեմ կարող անուններ հնչեցնել, որովհետեւ չգիտեմ»:
Հարցին, թե արդյոք հասարակությունը մասերի չէր բաժանում Նիկոլ Փաշինյանը, որը պատերազմի ժամանակ հայտարարում էր, որ ռազմի դաշտում կան դավաճաններ, Մակունցն արձագանքեց. «Ես չեմ հիշում, որ վարչապետը նման հայտարարություն արած լինի պատերազմի օրերին»:
Նա ընդգծեց, որ պատերազմի հետ կապված բոլոր դրվագներով կլինի քննություն, այն ժամանակ կկարողանան վերջնական եզրահանգումներ անել:
