Ղարաբաղում 44-օրյա պատերազմի եւ բանակցային գործընթացի հանգամանքները պետք է ուսումնասիրվեն հատուկ խորհրդարանական հանձնաժողովի կողմից: Այս մասին մայիսի 10-ին Ազգային ժողովի հատուկ նիստում ՀՀ վարչապետի ընտրության հարցի քննարկման ժամանակ հայտարարեց վարչապետի պաշտոնակատար Նիկոլ Փաշինյանը՝ պատասխանելով պատգամավորների հարցերին:
Միաժամանակ նա ասաց, որ պատրաստ է հարցաքննության գնալ:
«Իմ անձնական աշխատասենյակն ու առանձնատունը նույնպես պատրաստ են խուզարկության: Թեեւ հայտնի իրադարձությունների ժամանակ դրանք արդեն ենթարկվել են մինի խուզարկության, բայց եթե այնտեղ ինչ-որ կասկածելի բան լիներ, ապա այն անպայման կգտնեին»,- ասաց Փաշինյանը:
Միեւնույն ժամանակ, նա ընդգծեց, որ 44-օրյա պատերազմը հետաքննելու համար խորհրդարանական հանձնաժողով ստեղծելու հարցը պետք է դառնա իշխանությունների օրակարգի մասը, եւ պետք է հարցաքննվի ներգրավվածների ամբողջ շրջանակը, այդ թվում՝ վարչապետը:
Կառավարության ղեկավարի պաշտոնակատարի խոսքով՝ կարեւոր է ոչ միայն հանձնաժողովի ձեւաչափը, այլեւ մթնոլորտը, քանի որ անցյալ տարվա նոյեմբերին անհնար էր այն ձեւավորել:
«Ես պատրաստ եմ եւ գիտեմ, որ թաքցնելու բան չունեմ: Եկեք պայմանավորվենք, որ դա կլինի նոր խորհրդարանի ամենակարեւոր խնդիրներից մեկը»,- ասաց վարչապետի պաշտոնակատարը:
