Նավթի համաշխարհային գները երեքշաբթի առավոտյան նվազում են Հնդկաստանում կորոնավիրուսային ծանր իրավիճակի հետ կապված պահանջարկի նվազման համար մտավախությունների ֆոնին:
Brent տեսակի նավթի հունիսյան ֆյուչերսների գինը նվազել է 0.69 տոկոսով՝ կազմելով 67.85 դոլար, WTI նավթի մայիսյան ֆյուչերսների գինը՝ 0.69 տոկոսով՝ մեկ բարելի դիմաց 64.47 դոլար:
Նավթի շուկան դեռ գտնվում է Հնդկաստանում կորոնավիրուսային իրավիճակի ճնշման տակ, որն աշխարհում երկրորդն է կորոնավիրուսով վարակման դեպքերի թվով: Երկրում դեպքերի թվի աճը շարունակվում է փետրվարի կեսերից: Մտահոգություններ են առաջացնում նաեւ Հնդկաստանում հայտնաբերված վիրուսի նոր շտամը:
Վերլուծաբանների կարծիքով՝համաճարակաբանական իրավիճակը շարունակում է ապրանքների գների դինամիկայի հիմնական գործոններից մեկը մնալ, իսկ պահանջարկի համար մտավախությունների ալիքը թույլ չի տալիս գներին ավելի բարձրացնել:
«Տարվա երկրորդ կեսին նավթի գների դրական դինամիկայի առանցքային բաղադրիչը կլինի այն, որ զարգացող շուկայի երկրները կվերահսկեն COVID-19-ի հետ կապված իրավիճակը, իսկ միջազգային ճանապարհորդությունները կվերականգնվեն»,- նշել են Oanda-ի վերլուծաբանները, ում կարծիքը մեջբերում է Wall Street Journal- ը:
Ներդրողները նույնպես շարունակում են հետեւել Colonial Pipeline-ի հետ կապված իրավիճակին: Ավելի վաղ Միացյալ Նահանգների այս խոշորագույն խողովակաշարային օպերատորը հայտարարել էր, որ որոշ ժամանակով դադարեցրել է խողովակաշարի հետ կապված բոլոր օպերացիաները, եւ ազդել է որոշ տեղեկատվական համակարգերի վրա: Ընկերությունը հույս ունի մինչեւ շաբաթվա վերջ «մեծ մասամբ» վերսկսել աշխատանքը:
