Ադրբեջանը հայտարարել է «Իսլամական պետության» ահաբեկչի ձերբակալության մասին: Ադրբեջանի պետական անվտանգության ծառայությունը հայտնել է, որ երկրի քաղաքացի Օրհան Ջամալովը (ծնված 1986թ.) 2014 թվականին ապօրինի տեղափոխվել է Սիրիա՝ ԻՊ-ի կազմում ապօրինի զինված խմբավորմանը անդամակցելու համար:
Ավելի վաղ Ջամալովն արդեն բանտային պատիժ էր կրել Ադրբեջանի Զաքաթալայի շրջանում գործող «Անտառային եղբայրներ» ապօրինի զինված խմբավորմանն անդամակցելու համար:
«Ջամալովին ազատ արձակելուց հետո, 2014-ի օգոստոսին, «Խանզալա» մականվամբ Շամիլ անունով մի մարդու հրավերով եւ օգնությամբ նա տեղափոխվել է Թուրքիա, իսկ այնտեղից անօրինական կերպով՝ Սիրիա, եւ ուղեւորվել է Ռաքքա քաղաք: Հիմնավոր կասկածներ կան, որ Ջամալովը միացել է զինված անօրինական «Ազերի Ջամաաթ» խմբավորմանը, որը ենթակա է ԻՊ ահաբեկչական կազմակերպությանը, եւ այս հանցավոր խմբի կազմում մասնակցել է զորավարժությունների ու զինված բախումների»:
Այս փաստերի հիման վրա Ջամալովին մեղադրանքներ են առաջադրվել, եւ նա կալանավորվել է:
