Բելառուսի համար երեք միլիարդ եվրոյի չափով ԵՄ ներդրումային փաթեթը կկասեցվի եւ կսառեցվի, քանի դեռ երկիրը «չի դարձել ժողովրդավար», հայտարարել է Եվրահանձնաժողովի նախագահ Ուրսուլա ֆոն դեր Լյայենը Բրյուսելում ԵՄ առաջնորդների հետ հանդիպման ժամանակ, որոնք կդիտարկեն Մինսկի դեմ հետագա պատժամիջոցները սահմանելու մասին հարցը, հաղորդում է Reuters-ը:
«Մենք ճնշում կգործադրենք ռեժիմի վրա, քանի դեռ, վերջապես, այն չսկսի հարգել ԶԼՄ-ների, մամուլի եւ կարծիքի ազատությունը»,-հայտարարել է Ուրսուլա ֆոն դեր Լյայենը:
Նրա խոսքով՝ նոր միջոցառումներն ուղղված կլինեն անձանց, որոնք ներգրավված են եղել Ryanair-ի ինքնաթիռի հարկադիր վայրէջքի գործում, ձեռնարկությունների եւ տնտեսվարող սուբյակտների մեջ, որոնք ֆինանսավորում են երկրի ղեկավարությունն ու Բելառուսի ավիացիոն հատվածը: Նա նշել է, որ նախագահ Ալեքսանդր Լուկաշենկոն եւ նրա ռեժիմը պետք է հասկանա, որ դա լուրջ հետեւանքներ կունենա:
Հիշեցնենք, որ մայիսի 23-ին Ryanair ավիաընկերության ինքնաթիռը, որը կատարում է Աթենք-Վիլնյուս չվերթը, Բելառուսի տարածքով թռիչք կատարելիս վթարային իրավիճակի մասին ահազանգել է: Տագնապի ազդանշանի պատճառն էր օդանավի ականապատման մասին հաղորդագրությունը:
Օդանավի հրամանատարի որոշմամբ ինքնաթիռը բարեհաջող վայրէջք է կատարել Մինսկի Ազգային օդանավակայանում: Ինքնաթիռում գտնվել է 123 ուղեւոր: Նրանք բոլորն անցել են ավիացիոն անվտանգության լրացուցիչ ստուգում եւ տեղափոխվել են օդանավակայանի տրանզիտային գոտի հետագա ստուգիչ միջոցառումների համար: Այնուհետեւ ինքնաթիռը ուղեւորվել է Մինսկի Ազգային օդանավակայանից դեպի Վիլնյուս:
Ինքնաթիռում գտնվել է Nexta տելեգրամյան ալիքի հիմնադիրներից մեկը՝ Ռոման Պրոտասեւիչը, որին Բելառուսի իշխանությունները համարում են ծայրահեղական: Պրոտասեւչին իջեցրել են չվերթից եւ բերման ենթարկել:
