Twitter-ն անհանգստացած է Հնդկաստանում իր աշխատակիցների անվտանգության համար եւ կառավարությանը կոչ է արել հարգել խոսքի ազատությունը։ Դա տեղի է ունեցել մի քանի օր անց այն բանից, երբ հնդկական ոստիկանությունն այցելել է Նյու Դելիում ընկերության գրասենյակ այն պատճառով, որ վերջինս իշխող կուսակցության ներկայացուցչի թվիթը որպես «մանիպուլյացիա» է նշել, հաղորդում է AP-ն:
Twitter-ը հայտարարել է, որ «մտավախություն ունի ոստիկանության կողմից ահաբեկման տակտիկայի օգտագործման վերաբերյալ» եւ «խոսքի ազատության պոտենցիալ սպառնալիքի վերաբերյալ այն մարդկանց համար, ում մենք ծառայում ենք»:
Երկուշաբթի օրը Հնդկաստանի ոստիկանությունն այցելել է Նյու Դելիում Twitter-ի գրասենյակ, որպեսզի ծանուցում հանձնի՝ պահանջելով պատասխանել, թե ինչու է նշված թվիթը «մանիպուլյացիա» որակվել: «Կարծես թե Twitter-ը ունի մեզ անհայտ որոշակի տեղեկատվություն, որի հիման վրա նրանք այդպես են որակել»,- ասվում է ոստիկանության հայտարարության մեջ:
Նախօրեին WhatsApp հաղորդագրությունների փոխանակման WhatsApp հավելվածը դատական հայց էր ներկայացրել Դելիի գերագույն դատարան՝ հայտարարելով, որ կառավարության նոր կանոնները, որոնք պահանջում են հաղորդագրություններին «հետեւել», հակասահմանադրական են եւ խաթարում են անձնական կյանքի անձեռնմխելիության հիմնարար իրավունքը: