Նախագահության ամենածանր բեռը ամենօրյա պատասխանատվությունն է։ Այս մասին հայտարարեց Հայաստանի երկրորդ նախագահ, «Հայաստան» դաշինքի առաջնորդ Ռոբերտ Քոչարյանը Մեղրիում հանդիպման ժամանակ։
«Եթե պատասխանատվության զգացում ունես, դա ծանր բեռ է։ Եթե չկա նման զգացում, ապա աթոռը զբաղեցնում ես կայֆի համար»,- բացատրեց Քոչարյանը՝ պատասխանելով հարցին, թե ինչու հեռացավ երկրի կառավարումից 2008թ.։
Երկրորդ նախագահը հիշեցրեց, որ այն ժամանակ ավարտվեց նրա լիազորությունների ժամկետը, եւ լավ առիթ էր իշխանությունը հանձնելու եւ գնալու՝ հանգիստ ապրելու։ «Ժողովուրդն այնուամենայնիվ ամեն ինչ կապում է առաջին դեմքի հետ, հենց առաջին դեմքից են սպասում բոլոր հարցերի լուծումները։ Դա կրկնապատկում եւ եռապատկում է պատասխանատվության բեռը։ Բայց առաջին հերթին, ուսերը պետք է դիմանան այդ բեռանը։ Ինձ մոտ այդ հարցում ամեն բան կարգին է»,- կատակեց Քոչարյանը եւ արդեն լուրջ ավելացրեց, որ բեռը չպետք է կոտրի այն կրողին։
«Գուցե, ընդմիջումն ինձ համար օգտակար էր, հնարավորություն տվեց վերագնահատել, աշխատել ինձ վրա, աշխատել այլ ոլորտում, փորձ ու գիտելիքներ ձեռք բերել խոշոր ներդրումներ ներգրավելու համար»,- շարունակեց նա։
Քոչարյանը փաստեց, որ երկրում ճգնաժամի պատճառներից մեկը ներդրումների զրոյացումն է։ Նա հիշեցրեց, որ երբ պաշտոնն ստանձնեց, ներդրումների ընդհանուր չափը կազմում էր 125 մլն, երբ հեռացավ՝ ավելի քան 4 մլրդ։ «Ներկայիս գներով դա մոտ 6 մլրդ է։ Դա նշանակում է, որ մենք կարող ենք ամեն տարի ապահովել 1 մլրդ-ի ներդրում»,- նշեց Քոչարյանը։