Առաջինն անհրաժեշտ է կարգավորել անվտանգության խնդիրը, իսկ անվտանգությունն ապահովելու համար պետք է Ռուսաստանի հետ կապն ավելի ու ավելի ամրապնդել։ Այս մասին այսօր՝ հունիսի 7-ին, Աբովյան քաղաքում՝ «Բարգավաճ Հայաստան» կուսակցության քարոզարշավի ընթացքում հայտարարեց «Բարգավաճ Հայաստան» կուսակցության նախագահ Գագիկ Ծառուկյանը։
«Պատերազմը ցույց տվեց, որ միակ պետությունը Ռուսաստանն է, որն առաջին օրվանից մեր կողքին էր։ Դրանից հետո պետք է զարգացնել տնտեսությունը, օգտագործել մեր սեփական ռեսուրսները։ Այնքան գործարարներ պետք է բացվեն, այնքան աշխատեղեր լինեն, որ մարդիկ դրսից գան այստեղ»,- նշեց նա։
Ըստ Գագիկ Ծառուկյանի՝ ուսանողների մասին բոլորն ասում են, որ նրանք մեր երկրի ապագան են, սակայն նրանց համար որևէ քայլ չի արվում։
«Ուսանողը դուրս է մնում համալսարանից վարձը չվճարելու պատճառով։ Ցավալի է, ամոթ է։ Ամբողջ աշխարհի համալսարաններում, երբ ուսանողն ընդունվում է համալսարան, համալսարանն իր հետ պայմանագիր է կապում, վճարը տալիս է առանց տոկոսի, ավարտելուց հետո համալսարանը պարտավորություն է վերցնում իր վրա, որ ուսանողին տեղավորի աշխատանքի։ Ուսանողն աշխատում է, իր պարտքը տալիս է համալսարանին և պիտանի մարդ է դառնում հայրենիքին»,- ընդգծեց Գագիկ Ծառուկյանը։
Գագիկ Ծառուկյանի խոսքով՝ կես տարին մեկ պետք է ինդեքսավորել թոշակները, և ըստ դրա բարձրացնել դրանք․ «Մեր ծրագիրն է, որ թոշակները տարեկան 10 % բարձրացվի»։
