Եվրասիական տնտեսական հանձնաժողովը ուսումնասիրում է ավիաշինության ոլորտում Եվրասիական տնտեսական միության պետությունների միջեւ արդյունաբերական համագործակցության ընդլայնման հնարավորությունները: ԵՏՀ-ն մտադիր է ակտիվացնել երկրների միջեւ համագործակցությունը այս ոլորտում, կառուցել փոխգործակցության նոր շղթաներ, ինչը, ի վերջո, կհանգեցնի ԵԱՏՄ-ում ավելացված արժեքի աճին: Այս մասին հունիսի 10-ին հայտարարել է ԵՏՀ արդյունաբերության եւ ագրոարդյունաբերական համալիրի նախարար Արտակ Քամալյանը՝ «Իրկուտ կորպորացիա» ՓԲԸ-ի Իրկուտսկի ավիացիոն գործարան մասնաճյուղի արտադրամասեր կատարած աշխատանքային ուղեւորության ժամանակ:
«Ավիաշինության ոլորտում համատեղ նախագծերը ԵԱՏՄ-ում ավելի պահանջված կդարձնեն միկրոէլեկտրոնիկայի, գործիքաշինության եւ հաստոցաշինության, սեւ եւ գունավոր մետաղագործության արտադրանքները», - նշել է Արտակ Քամալյանը: «Միության ավիացիոն արդյունաբերությունը ունի եւ տեխնոլոգիական, եւ կադրային ռեսուրսներ ներքին եւ համաշխարհային շուկաներում հետագա աճի եւ դիրքերի ամրապնդման համար»:
Ինչպես ընդգծել է ԵՏՀ նախարարը, ավիաշինության ոլորտում Միության ձեռնարկությունների ներուժը մեծ է, եւ այն պետք է ամբողջությամբ իրացվի:
Արտակ Քամալյանի եւ Իրկուտսկի ավիացիոն գործարանի գլխավոր տնօրեն Ալեքսանդր Վեպրեւի հանդիպման ժամանակ ավիացիոն արդյունաբերության ոլորտում համագործակցության հետագա զարգացման վերաբերյալ առաջարկություններ են արվել, որոնք դիտարկվելու են Հանձնաժողովի հարթակում: