Կյանքից հեռացել է Նիկարագուայի նախկին նախագահ Էնրիկե Բոլանոս Գեյերը, որը երկիրը ղեկավարում էր 2002-2007 թվականներին: Նա 93 տարեկան էր:
Ընտանիքի հայտարարության մեջ ասվում է, որ Բոլանոսը մահացել է երկուշաբթի ուշ երեկոյան: Պատճառը չի հրապարակվում, հաղորդել է AP-ն:
Բոլանոսը ծնվել է 1928 թվականի մայիսի 13-ին Մասայա քաղաքում, կրթություն է ստացել կաթոլիկ դպրոցներում եւ ԱՄՆ-ի Սենթ Լուիսի համալսարանի ինժեներական կոչում է ստացել:
1950-ականներին նրա ղեկավարած բամբակի կոնսորցիումը ամենամեծերից մեկն է Նիկարագուայում: Հաջորդ երկու տասնամյակների ընթացքում ղեկավարել է մի շարք մասնավոր ընկերություններ, ապա ղեկավար պաշտոններ ստանձնել 1980-ականների Նիկարագուայի ամենակարեւոր բիզնես ասոցիացիաներում:
Սանդինիստական ապստամբների հաղթանակը եւ բռնապետ Անաստասիո Սոմոսայի տապալումը 1979 թվականին հանգեցրին նրան, որ նոր հեղափոխական կառավարությունը բռնագրավեց Գեյերի ավելի քան 10 ձեռնարկություն: Գործող նախագահը՝ Դանիել Օրտեգան, ղեկավարում էր այդ կառավարությունը 1985-1990 թվականներին:
Որպես Մասնավոր բիզնեսի գերագույն խորհրդի նախագահ՝ նա պայքարել է Սանդինիստական ճակատի կառավարության դեմ՝ հանուն մարդու իրավունքների եւ ազատությունների, «ինչի համար մի քանի անգամ ձերբակալվել է, իսկ 1985 թվականին բռնագրավվել է ընտանիքի ամբողջ ունեցվածքը», - ասվում է Էնրիկե Բոլանոսի գրադարանի հրապարակած կենսագրության մեջ:
